الصفحة الرئيسية » سوالف وقصص أعضاء خطبة » الله يكون بعون الجميع
صفحات 1 2
10/27/2008 1:35:05 AM
Karbala
Posts 318
السلام عليكم

اخواني واخواتي ..

المنتدى كانت لنا نعمة .. عرفنا نوعيات الناس اللي بالموقع ..

بصراحة .. الله يكون بالعون خصوصا بالبنات الله يستر عليهم

أقسم بآيات الله ... اني دخلت وهدفي شريف .. لاني شخص ملتزم وأخاف الله سبحانه

ولو ان هدفي التعرض لأعراض الناس .. في ألف موقع لهذا الشئ ..

لانه الصراحة .. واجهت شباب الله يهديهم ويصلحهم .. ما اعرف اشلون تفكيرهم لا دين وعقل

وناستهم بأيذاء الناس .. سواء بالكلام او بحركات

ما اقول الا حسب الله ونعم الوكيل

قبل المنتدى .. كنت مرتاح . وعدد اللي يشاهدون سيرتي الذاتية قليل جدا

بس الحين .. يوميا بالعشرات .. مو عارف ليش !!!

من راقب الناس مات هما ..

وقررت اني اقاطع المنتدى ... وما اشارك الا للضرورة

عموما ... تمنياتي للجميع بالتوفيق

تحياتي لكم
اخوكم/ كربلا
10/27/2008 9:07:12 AM
khale_dm
Posts 358
اخوي الغالي كربلا


بكل مكان فيه الزين والشين


ويوجد بعض الشباب الله يهديهم هدفهم ازعاج الاخرين

وطبعا بالاخير كل واحد يرجع لبيئته وتربيته


اما بالنسبه للاشخاص اللي يدخلون على السيره الذاتيه .....فبالنسبه لي ..اي شخص او بنت يدخلون على السيره الذاتيه لازم يطرشون لي اهتمام او ايميلات


كونك اخو عزيز وغالي اتمنى تعدل عن قرارك لانك ورده المنتدى

اخوك/خالد
10/27/2008 9:33:41 AM
gem
Posts 267
يا اخالد يا شيخ الشباب و ي سيد العارفين ...انت صاحب الخبرة و خير من يصد هجومات و تهجمات العذال و المتطفلين ان كان احد مضايقك
بقول لك شي ... اللي تعرفت عليهم بالمنتدى .. هل هم ناس مش اد المآم ( على قولة المصريين ؟ و الا شايف انهم لما يتكلمون معاك فانهم يبون منك شي و الا اي شي ثاني تشوفه فيهم مريب ؟؟
مو قاعدين يتواصلون معاك من قلبهم و محبتهم لك ؟؟ اشلون تقطهم على صخر و ما تعبر هالمحبة اللي يكنونها لك
اذا تييلك اذية من بعض ناس بالموقع .. بلغ و الادارة ما تقصر
اذا تييلك من شباب عندك اياهم .. و اذا من بنات سو ( كول دايفرت ) حق اخوك اللي يهديك !!
10/27/2008 9:47:25 AM
gem
Posts 267
آسف كبست زر خطأ و راح الموضوع ... تكملة ...
فاقول لك و اكرر و اصر و الح على الكول دايفرت .. بس مو تحولهم حق كربلا على بو انه رفيجك
علامك الله يهديك ترى المنتديات كلها جذيه و اللي يتهجم عليك او يضايقك يكون بو ربية قاصرة تخلي هالناس اللي ربياتهم ناقص تغلبك ؟؟؟ هذا انت يبيلك شغل على هالمعدل
انا شايف شخصيتك عدل من مشاركاتك ... انت طيب و بسيط و المشكلة انك حساس بدرجة كبيرة جدا ... و هذا الكلام ما ينفع في منتدى ... فمثل ما اكو ناس اوادم تتعامل معاهم ... اكو ناس مو خوش ناس لازم تكون متهيء لهم عدل و الا بتنبط مرارتك على خال بلاش
كلنا نتعرض لموضوع البروفايل و الاهتمامات ... انا شخصيا ما اهتم لا لهذا الموضوع و لا ذاك ,,, ناس دشوا على بروفايلك .. فهو معروض للناس يشوفونه
يدزون لك اهتمام .. قول شكرا ... يدزولك رسايل .. مرة ثنتين ... بعدين بلوك لما تشوف ان هالباب يجيب دخان ... تدري شيسدونه فيه ؟؟؟ ماقدر اقول
اترك عنك يا خوي يا خالد كالتفكير و خل المنتدى عامر بالناس الطيبة ووجودك انت و كربلا و بعض الشباب مخليه منتدى طيب ...
لان منتدى بس بنات ترى ما ينبلع Whaaaaa?
10/27/2008 10:33:01 AM
amo0on_mlgofa
Posts 24

هاي

سوري يمكن أكون داشة عرض.. بس شفيها يعني لمن يدشون يشوفون سيرتك الذاتية؟

الصراحة آنا عن نفسي يعني وايد أحب أشوف كل شخص شنو كاتب عن نفسه ببروفايله

يمكن مافي أحد بهالموقع إلا و أكون حايسة ببروفايله و إحتمال أكثر من مرة بعد :/ لأنه النكات وايد و أنسى الصراحة

أول ما تبطل المنتدى اقترحت إنه ينكتب تحت نك المشارك بأي موضوع تفاصيل عن عمره و حالته و جم شغلة يعني عشان ما نضطر ندش على بروفايلات العالم أكثر من مرة!

عاد اهم كيفهم الضاهر سياستهم اللي مو عاجبه Brick Wall

Green Tongue

بسسسس اللي يتهجم عليك أو يأذيك هذا موضوع ثاني والمفروض ترد عليه أو توقفه عند حده

وما تفرح قلبه بالإنسحاب من المنتدى.. لأنك محرك المنتدى ماشالله عليك

بعطيك حرز إذا تبي Stick Out Tongue

قرقت وايد.. سوري

Gunslinger
10/27/2008 10:36:56 AM
gem
Posts 267
تدري عاد اقوللك ... ابد ما انتبهت للاسم
اساميكم تتشابه يا خوي
هذا كلام من القلب للقلب فلا تتضايق
كربلا يوز عن هالسوالف و هالكلام اللي قلته لخالد ينطبق عليك تمام و انتو الاثنين مثل جاسم و فيصل
فمنتدى بدون هجوم ما يسجل
على فكرة ... عسى سيرتك الذاتية اللي حاطها محتشمة ... اي لا الناس يشوفونها
انا لما قلت راح ابتعد عن المشاركات المباشرة كان لي اسباب وايد اكثر عمق من اللي انت ذكرته
و مع ذلك شوف .. ما ابتعدت عن المنتدى ... يمكن ما لي ردود و لكن المشاركة اعدها شي هام لاني تعودت على الاخوان و الاخوات
بعدين ذكرني منو اللي قبل كم يوم قال لي ان لا اترك المنتدى ؟ ... اثرك تقص علي ؟؟
اففففاااااااااااااااااااااااااااااا يا بلبل
10/27/2008 11:30:25 AM
hassasa
Posts 65
والله يا اخواني ياحلوين المنتدى مايستغنى عنكم..

لاتطلعون.. مشاركاتكم واااايد حلوه وهادفه.. راح يصير المنتدى حده بااااايخ بدونكم ياشباب..

واذا واحد منكم راح يطلع يااااويله منى Gavel

اذا طلعتوا .. حتى آنا بطلع وماراح اشارك بعد Cry

حساسه.. ودمتم سالمين
10/27/2008 12:23:24 PM
hassasa
Posts 65
أخوي كربلا...

لأنك شخصية ناااشطه في المنتدى وحلوه وحبوب وخوووووووش واحد.. تلقى اللي ينعجب فيك واللي يغار منك ويحسدك..وفي بعضهم عنده فضول من ناحيتك..

انت لاتهتم .. بالعكس خلي يكون هذا دافع لك بانك تستمر.. وهذا دليل على نجاحك وشخصيتك الناجحه..

حساسه.. ودمتم سالمين
10/27/2008 1:40:51 PM
gem
Posts 267
و الله لو انا مدلعيني هالكثر جان علمتك شسوي باللي وصلني لحالة الرغبة بالانسحاب
لا و دلع حساسة بعد ... ابشر بالحساسية
هي من شالت هالمطرقة ... صايرة لنا قاضية ... ما اظنك بايع عمرك
يللا نورنا بمواضيع جديدة مثل ما عودتنا
و اذا للحين معزم ... رد لنا كل هالكلام الطيب اللي قلناه لك بس نبي حئئئئنا ناشف بالدولار يافندم
10/27/2008 4:33:32 PM
layla73
Posts 45
انتو شسالفتكم ؟ كل من يصير له شي بالموقع يطلع من المنتدي
يا جماعه اللي الاحظه ان الكل قاعد يمشي

مشت حزن و الحين كربلاء و باجر مادري منو
اذا متضايقين احنا شنو ذنبنا ؟ علي الاقل نستفيد من آرائكم الطيبه
10/27/2008 7:10:30 PM
THEHOPE333
Posts 95
كربلااااا ... انا لاحظت وشفت الي صار بالمنتدى وطقيت سنسر البااااص ههههههههههههههههه
وأقووووووووووووووولك :

"إذا طعنت من الخلف , فاعلم أنك في المقدمة"

وترا في الدنيا ناس حمدالله والشكر الذي عافانا
فلا تهتم ولا تلقي لها بال .. لانها لاقامت ولا قعدت ..
واهي هالناس لو فيها من الذوق شي ... ما ادش باسلوب الهجوم بدال الكلمة الطيبه او بالاحرى تعليق وابداء وجهة نظر بطريقة لائقة
يعني مثل ما هالناس تافهه لا تلتفت لهم ^_^
10/29/2008 12:55:31 AM
Karbala
Posts 318
السلام عليكم

اخواني واخواتي ..

منو قالكم اني متضايق من اللي يدخلون السيرة الذاتية .. بالعكس هذا يبين ان قاعد اسوي شئ لفت انتباهم

بس المشكلة مو في اللي يشوف السيرة الذاتية .. ويتوكل على الله

انا مشكلتي مع الملاقيف واصحاب المشاكل .. واللي بس همهم عمل مشاكل

خصوصا الفاشلين .. يطلع حرته بغيره

وانا الصراحة ما احب .. اقعد اتناجر مع احد متخلف او بدون دين وعلم

عموما ... انا بحاول اشارك حسب المستطاع

تحياتي لكم
اخوكم/ كربلا
10/30/2008 10:00:48 AM
hassasa
Posts 65
تحياتي لإخواني الشباب وأخواتي البنات...

محتاجه دعائكم.. أمي مريضه وااااااااااااايد.. لاتبخلون عليها بالدعاء Cry

والله يخليلكم أحبائكم


اختكم حساسه
10/30/2008 10:32:18 AM
gem
Posts 267
افاااااااااا
الف سلامة باذن اللي ما تنام عينه
تقوم انشالله بالسلامة و تعيشون بظلها العمر المديد
10/30/2008 9:56:30 PM
newlife
Posts 73
أختي حساسة عسى الله يشافي أمج ويقومها لج بالسلامة يارب ويشافي كل مريض بإذنه تعالى ..

ادعي هالدعاء اللهم أنت الشافي المعافي لا شفاء إلا شفاءك اللهم رب الناس اذهب الباس واشفي أمي واشفي كل مريض والله يشافيها بإذن الله
10/31/2008 2:11:10 AM
THEHOPE333
Posts 95
السلام عليكم

حساسه : ماتشوف شر امج والله يقومها بالسلامة

واقعدي اقري عليها سورة الفاتحة لانه اسمها الشافية من سبع مرات وفوق
وأهم شي ياحساسه انج تامنين بالله وبقضاءة وتحمدينه على كل حال
وتوكلي على الرحمن
10/31/2008 3:28:46 AM
guest_q8
Posts 150
Karbala كتب:
السلام عليكم

اخواني واخواتي ..

المنتدى كانت لنا نعمة .. عرفنا نوعيات الناس اللي بالموقع ..

بصراحة .. الله يكون بالعون خصوصا بالبنات الله يستر عليهم

أقسم بآيات الله ... اني دخلت وهدفي شريف .. لاني شخص ملتزم وأخاف الله سبحانه

ولو ان هدفي التعرض لأعراض الناس .. في ألف موقع لهذا الشئ ..

لانه الصراحة .. واجهت شباب الله يهديهم ويصلحهم .. ما اعرف اشلون تفكيرهم لا دين وعقل

وناستهم بأيذاء الناس .. سواء بالكلام او بحركات

ما اقول الا حسب الله ونعم الوكيل

قبل المنتدى .. كنت مرتاح . وعدد اللي يشاهدون سيرتي الذاتية قليل جدا

بس الحين .. يوميا بالعشرات .. مو عارف ليش !!!

من راقب الناس مات هما ..

وقررت اني اقاطع المنتدى ... وما اشارك الا للضرورة

عموما ... تمنياتي للجميع بالتوفيق

تحياتي لكم
اخوكم/ كربلا



أخوي كربلا كل انسان وله سلبيات وايجابيات وما في انسان كامل والكمال لله وحده سبحانه.

بس حبيت أوضحلك شغله الانسان لما يحس انه في ناس تنتقده لا يحط في باله انهم يحاربونه لازم يعرف شنو الشئ اللي سواه وخلاهم ياخذون موقف منه .

انا اتكلم عن الناس الكبار مالي شغل بالشباب الصغار , انا مره انتقدتك في احد المواضيع وكنت انت كاتب الموضوع لاني شاركت في موضوعك وكنت انتظر منك كلمة شكر او تعقيب ,

لكن للاسف كان انتباهك موجهه فقط لمشاركات الخوات وكنت تعقب على مشاركاتهم وتشكرهم وتتغشمر معاهم , فعشان جذي حبيت اوضحلك انه مو كلك شخص ينتقدك يكون حاقد عليك

بالعكس على شنو أحقد انا ما شفت منك الا كل خير , واتنمى انك تستمر معانا بالمنتدى .

تقبل مروري

أخوك : أحمـــــــــــــــد***
1/31/2009 5:51:20 PM
TALAL_4488
Posts 362
يقاااااااااال
دائمااا الناااجح محااارب
تحياتي لك
1/31/2009 11:10:57 PM
Wrda
Posts 16
والله كل واحد ونيته

وعسى ربي يوفق الجميع
2/4/2009 10:58:31 AM
meme83
Posts 70
اخوي كربلا
انت شخص لك مكانتك بالمنتدى و هالشي انت قاعد تشوفه الحين من ردود المشاركين و هالشي انا شفته شخصيا من مشاركاتك لاتحرمنا منها .

اللي يحسدك او يضرك هذا دليل على نجاحك و من غيرته منك لاتترك هالشي يؤثر عليك .

الله يوفقك
صفحات 1 2
|
تسجيل faq AspNetForum v.0.0.0.0