dina71 - جميع رسائل المستخدم
12/12/2010 6:38:18 PM
الكذب فى المنتدى السلام عليكم
انا بس حبيت اعلق على ما كتبه الاخ بالنسبى لخيانة الزوج. فالاخ يسأل مستنكرا اذا الزوجه ربة بيت جيده لماذا قام الزوج بالخيانه؟ معنى هذا الكلام ان سبب الخيانة هو المرأه! يعني هذا الزوج حرام الله ما راح يعاقبه ولا يحاسبه لان السبب في الخيانة هي زوجته فاذا كان زاني مثلا فلا اثم عليه حرام ما سوا شي وده يكون زين بس شيسوي مرته مو زينه مو دايره بالها عليه!
عيل ليش الله سبحانه شرع الطلاق والزواج! يا أخي اذا الزوجه غير صالحه خلاص تسريح باحسان مو اقوم واعرف عليها عليها عشرين الف وحده ثانيه بعدين نقول لا اهي السبب! لا مو اهي السبب نقص عقول الرجال هي السبب! يبون كل شي على الجاهز ولا يتعبون في شي حتى الخيانه سببها طلع يا حرام المرأه!!!
12/24/2010 10:33:53 AM
كلمتين عن الشخصية الكويتية وانا بعد اضم صوتي الى الاخوان... واقول للاخ صاحب المقال والله صح لسانك...كما انني احب ان اضيف اضافه بسيطه وهو اعتقاد شخصي لا اكثر ولا اقل بأن السبب الذي يجعل هؤلاء الاشخاص ينتقدون اي طرح او فكره جديده هو اما الغيره الشديده من صاحب الفكره او الجهل الكامل عن موضوع الفكره. فالكويتي لا يحب ان يسبقه احد بأي شئ ( يحس انه طايفه شي وايد وانه بيموت اذا ما لحق!)وهذا ينطبق على اي شي جديد يطرح سواء على مستوى الافكار او مستوى السلع ( سياره، تلفون، حقيبه اخر موديل للسيدات طبعا وهكذا) يعني باختصار لازم اهو السباق الى هذه الامور واذا مو اهو فيعمد الى انتقاد الشئ الى ان ( يطيح سوقه مره وحده). او طبعا يكون ما عنده فكره بتاتا عن الموضوع يعني ما يدري وين الله قاطه بس طبعا ما يصير يقول مادري ( صكوا على اخوانا المصريين) لازم يطلع الف عذروب في الشي وهو ما عنده من السالفه قد شعره!!!
12/24/2010 10:51:34 AM
تعارف وتواصل! الصراحه ما اعتقد اني راح احقق الهدف اللي انشئ من اجله الموقع وهو اتاحه الفرصه للأشخاص بالتعارف ومن ثم الارتباط. فالطريقه التي يستخدمها 70% من الاخوان الافاضل في الموقع للتواصل والتعارف لا تتناسب مع ما تربيت عليه ولا مع قناعاتي الشخصيه. هذه الطريقه هي استخدام الموبايل او التلفون.
يدخل عليك الواحد منهم يسلم ويسأل بس سؤال واحد: في مجال للتواصل اقول نعم تفضل يقول هذا رقم تلفوني اتصلي فيني انطرج!!! ( احلف) انزين يا اخي لحظه نتفاهم اول ما يصير...يقول انتي من شنو خايفه؟! انا ريال مو ياهل...انت ما ودج تتزوجين؟!! واذا قلت مبدأي ما يسمحلي اكلم ريال غريب وما اعرفه يقول اشلون هذا تفكيرج انتي دارسه متعلمه عندج شهاده!!! نعم؟ عندي شهاده انزين خير يعني؟؟ واذا قلت اخوي شخبار التلفون هذا عصر الانترنت التفلون موضه قديمه قال انتي مو جاده داشه الموقع تلعبين!! يا اخي عمرك ما سمعت عن شي اسمه الحياء؟ يعني والله استحي اكلم احد ما اعرفه لا وبغرض الزواج بعد يعني هذا اللي بيكلمني بيفنطني تفنط وما راخ يخلي سؤال شخصي ما راح يسأله وفيج خير لا تجاوبين تصيرين مو جاده وتلعبين! انزين اذا بالغلط ضحكت هذا ما يعتبر خضوع بالقول؟ واحنا منهيين عن هالشي؟ عادي عادي ما ودج تتزوجين؟!! اشدعوه!
صراحه انا مادري منو الصح ومنو الغلط... الدنيا صارت تمشي بالمقلوب يا جماعه ولا الاساتذه اللي انا صادفتهم اهني يايين من كوكب اخر وما لقوا شي يحطونه بالبروفايل وكتبوا الموطن الكويت! اكيد اهم يسيرون علينا يزورون الموقع ويرجعون كوكبهم تالي!!
لهذا السبب اقترح على اللجنه المنظمه للموقع شاكره ان تضع من ضمن الاختيارات في الموطن : كوكب اخر ..... علشان كل واحد يعرف منو قاعد يكلم!
12/31/2010 2:20:55 PM
الكذب فى المنتدى اختي مثل ما يقولون my God صح لسااااااااااااااااااانج
مشكوره على الاطاله ومشكوره على الرد صراحه افحمتي الاخ
انا بس احب احط خط تحت تعليقج عن الاب اللي يكون بس اب اذا الام على ذمته بمجرد ما يتم الطلاق ابوته بعد تنتهي يعني عنده تاريخ صلاحيه الابوه ينتهي بانتهاء عقد الزواج
سبحان الله ولا كأن الابناء يشيلون اسمه!! ومن يكبر شوي يقول حق عياله ما احد يسأل عني ما فيكم خير لا وامكم ما علمتكم السنع!!!
1/11/2011 5:54:02 AM
الكذب فى المنتدى السلام عليكم
اخوي انا بس ودي اسأل منو قال المرأه من حقها تاخذ نصف البيت اذا مو دافعه فيه نصف القيمه؟؟ هذا غير صحيح
ما ينكتب اسمها الا اذا دفعت نصف قيمة المبلغ طبعا والله حتى في ناس تشوف الزوجه دفعت كم تحط نسبه على حسب قيمة البيت مرات ما تبلغ النصف
1/12/2011 8:18:04 AM
الكذب فى المنتدى السلام عليكم
اختي vanilia جزاك الله خير ومشكوره على الوقت اللي عطيتينا اياه و الافاده المسهبه والشامله. اشكرك على المدح وهذا من ذوقك وطيبك.
الاخ كاتب المقال هم يعطيك العافيه و الله يجزيك ويعوضك خير ان شاء الله. اخوي في قاعده مهمه في علم التنميه البشريه وهي Perception is projection بمعني ان كل ما نؤمن بانه حقيقي وصادق يعتمد اعتماد كلي على فلترتنا احنا للمواضيع والاحداث وعندنا مثل كويتي يقول كل من شاف الناس بعين طبعه. مع احترامي الشديد لك اخوي بس انت يمكن مو منتبه حق هالنقطه علشان جذيه لازم ترد تفلتر الاحداث من اول وجديد وتحاول تغيير وجهة نظرك لبعض الامور وانا متأكده ان كل شي بحياتك راح يتغير. وترا هالنصيحه لي انا قبل ما تكون لك انت لاني انا ترا وايد اغلط نفس هالغلط وابدي الشينه قبل الزينه.
اخي الكريم انا لا اريد ان اضيع الوقت في الدفاع عن وجهة نظري او ان ارد على اتهامك لي باني اشفي غلي لان اتهامك غير صحيح. ولكن كل منا له تجربته الخاصه التي اكتسب من خلالها بعض الخبرات. هذه الخبرات لا تعطينا بأي حال من الاحوال الحق بأن نحكم على الاخرين او نفرض وجهة نظر معينه او ان نتحامل او نحمل الاخرين نتيجة تجاربنا او حتى ان نشفي غلنا مثل ما قلت. السالفه كلها ان كل واحد يعرض رايه ويأمل من الله سبحانه السداد والاستفاده. اخي الكريم... الله يوفقك ويسدد خطاك... واحب ان اختم بالحديث القدسي" أنا عند ظن عبدي بي إن ظن خيرًا فله وإن ظن شرًا فله" الله يكتب لك الخير ولكل من ساهم في الحوار. مع جزيل الشكر
1/15/2011 11:48:29 AM
الكذب فى المنتدى جزاك الله خير اخ سعد وعساك عالقوه
2/10/2011 7:26:14 PM
فضيـــــحه عـــضو ... !!! جزاك الله خير اخوي. ما املك الا ان اقول: wow
3/7/2011 11:02:02 PM
تعارف وتواصل! اللهم امين.
جزاك الله خير اخوي
4/3/2011 9:37:01 AM
تعارف وتواصل! السلام عليكم اختي يعطيج العافيه ومشكوره وموضوعج وايد مهم وحلو ليتج حاطته كموضوع جديد لانه شيق وحلو. تدرين لو ما الواحد يقول في امل والدنيا ما تخلى من الطيب لكدت اجزم ان كل اللي داشين هالموقع جذابين ولا هم صوب الزواج بالاساس. اتكلم عن الزواج بمفهومه الشرعي والاجتماعي والعاطفي مو ورقه وعقد وبس! اكثر اللي مروا علي يبون زواج سري علشان مرته ما تنجرح( كلش مو خايف منها ولا من طوايفها) لا ومسمي نفسه ريال! اوكي اهي مرتك ما تجرحها والبنت اللي بتاخذها هذه شنو مو بنت ناس؟ ما عندها مشاعر تنجرح؟ باجر اذا اهلها دروا عنها متزوجه بالسر شنو بيقولون.. اشلون ترضى عليها تجريح الناس؟ يمكن يفكر اكون خذيت وحده ثانيه ( بدل تي شيرته على قولتج) لا والمصيبه ان حتى المطلق ما يبي زواج رسمي! يبي علاقه قبل الزواج وواذا انتي تخافين الله ( لان بعضهم عادي عنده الزنا) خلاص عقد سري يمكن بدون حتى شهود. يجربج تعجبينه ولا لا بعدين عاد يقرر!!!! طبعا هذا حق البنات اللي سبق لهم الزواج اما البنات يمكن حتى ما يفكر يقوللج ما ابلش نفسي معاها! يعني بإختصار الوضع مأساوي وتعيس
4/4/2011 11:03:00 AM
تعارف وتواصل! صباح الخير حبيبتي هلا فيج واستمتعت بردج وايد
مشكوره على النصيحه وانا معاج وعدل كلامج
بالنسبه للموقع انا فعلا ادش اقرا في المنتدى لانه ممتع ومفيد. والصراحه علشان الحق بس ان في ناس غاية في الاحترام والصدق وفعلا لما ما اتفقنا كل واحد راح بطريقه بكل احترام وحق هالمجموعه من الرجال اقول كثر الله من امثالكم. اما اللي داش يتسلى ويلعب الله يشغله بنفسه ان شاء الله وفي الشي المفيد ويهديه ويسعد قلبه ويكتب الخير للجميع
تقبلي تحياتي وامتناني وشكري
الصفحات 1
تسجيل faq AspNetForum v.0.0.0.0