|
4/20/2010 6:04:16 PM
|
|
ماهو أفضل هاتف نقال؟
|
طبعا اجهزة النقال اليوم بالهبل صارت ! وكل شركة تقول الزود عندي ، فصعب نحصر احسن جهاز نقال بالعالم ، لانه كل جهاز له مميزات وعيوب . ولكن انا من وجهة نظري المتواضعه انه من افضل الاجهزة اليوم الي متوفره في السوق اهيه السوني اريكسون اكسبيريا اكس 10 ، هذا جهاز الله يسلمج يحط الاي فون صفر على الشمال مع احترامي الشديد للاي فون بس هذا الواقع. وفي مواصفات قويه جدا منها :
1- كاميرا بقوة 8 ميجابكسل مقارنه في كاميره 3 للاي فون وبدون فلاش
2- تصوير فيديو بدقة ( دبليو في جي ايه 800 * 480 ) مقارنه في ( في جي ايه فقط 600 * 480) للاي فون
3- طبعا يدز بلوتوث وكاميرته فيها فلاش مو نفس الاي فون المسكين ، الي لازم تركبيله برنامج عشان هالشيء ويمكن يضبط او لأ.
4- شاشة عرض بحجم 4 انج ودقتها كذلك ( 850* 480 ) مقارنه في ( 320 * 480 ) ، طبعا كل ما زادت الدقه كل ما الصوره تكون اوضح واجمل
5- شكل انيق ورائع ونحيف ، واللون الابيض حق البنات شيء مو طبيعي عليه
6- عليه نظام جوجل اليديد المسمى الملقب باندرويد والذي يتميز بالسرعه والسلاسه
7- بطاريه قويه ، وكذلك البروسسر 1 جيجا ( 1000 ميجاهرتر ) مقارنه في 600 ميجاهرتز للاي فون
المهم مابي اعقدكم زياده ههه ، لانه ادري في ناس مو متخصصين في هالامور فما راح يفهمون معنى كلامي ، طبعا سبب مقارنتي حقه في الاي فون ، لانه الاي فون يعتبر جهاز متفوق ومتقدم تقنيا بالاضافه الى انه الاكسبيريا اكس 10 هو منافس للاي فون وكذلك يعمل بنظام اللمس بالكامل . وادري كذلك انه البعض راح يقول انه الاي فون راح ينزل جديد ، وانا اقولكم مواصفات الاكس 10 حتى افضل من الاي فون الجديد بعد عشان اريح بالكم 
والي مهتم اكثر في الموضوع يقدر يشوف شكل الجهاز مواصفاته في هالفيديو :
http://www.youtube.com/watch?v=ohbVx3K1o9A
|
|
10/15/2011 9:56:01 PM
|
|
ملاحظاتكم بنات عن ( بعض ) شباب الموقع ...
|
السلام عليكم،
يعطيكم العافيه على الموضوع المفيد والشيق، وبصراحه انا كذلك ودي اسهب ببعض آرائي، الي ادري راح تساهم في انتقادي، ولكن انا بتكلم بكل امانة وشفافية وموضوعية، وما راح اجامل واطبل حق اي احد! اوكي خلونا نبدي:
بصراحه يا بنات موقع خطبه وهالكلام موجه فقط للجادين والي يخافون ربهم وملتزمين! خلونا من الي داشين لعب وجمبزه لانه ما يستحقون حتى اتكلم عنهم.
المهم، دام انتو داشين موقع حق التعارف، عيل توقعو انه الريال يبي يتعرف عليكم، نعم يبي يتعرف عليكم. طبعا مو معنى كلامي انه يتعرف ويخربط و و، لأ بس يبي يتعرف عليكم بصوره تكون اكثر من مجرد الصوره التقليدية الي انتو عارفينها. ما فكرتو يا بنات، لو كان الريال يبي زواج تقليدي من الاساس ليش اشترك بالموقع ؟ بالعقل يعني خلونا واقعيين ولحد يقص على نفسه. جان بكل بساطه راح قال حق والدته خطبيلي وكان الله غفور رحيم. وانتو نفس الشيء، دام انه على قولتكم كل شيء عيب وحرام وانا انسانه عفيفة واخاف ربي، يا ربي ليش داشة اهني، خلاص قعدي في بيتكم ونطري نصيبج! بعد ما يصير، داشه الموقع وهم تتشرطين. ما في شيء مثالي وكل شيء في عيوب!
قبل لا تعصبون علي، سمحولي افصل في هالنقطة اكثر. ايبلكم مثال حق وحده من المغفلات الي سولفت معاها شوي وبينت حقها انه ودي اتعرف عليها بصوره جديه اكثر، ردت علي وقالت لوسمحت احترم نفسك واذا تبي تيي حقي تعال من البيت بس ! قلت لها اوكي، بس مو المفروض اتعرف عليج قبل، يعني يا بنات خلق الله ترى احنا كنه بالجامعه ويامه سولفنا مع زميلات لنا قمه في الاحترام، شنو المانع انا اقابل البنت في مكان عام، ونتكلم بكل صراحه واحترام دام النية زينه، وهالشيء يصير جدام الناس.
لازم يعني اذا بقابلها بسوي شيء مو زين ؟ اهني تكمن المشكلة، انه بعض الناس غير واقعيين في طلباتهم وبالتالي هذا الي بدوره يؤدي حق الصدمة والاحباط! وهالبنت الي كلمتكم عنها، الله يشهد كلمتها بكل احترام وذرابه، شفتها ردت علي باسلوب وقح جدا، وتقول انا انسانه اخاف ربي مو مثلك وانا انسانه احترم ديني، يعني بالله عليكم الي يخاف ربه ويهمه دينه، مو الأولى يعدل اخلاقه ؟! شنو هالنفاق الي البعض عايش فيه والعياذ بالله.
المهم الي بوصله لكم عزيزاتي، انه وعلى نياتكم ترزقون، اذا نيتكم زينه، فماكو مانع يصير تعارف بحدود الادب والمعقول، اذا حسيتو الطرف الثاني قام يطلب شغلات خاطئه او على قولة البعض بس يبي يسوي شغلات مو زينه مع البنت خلاص البنت من اولها تقوله مع السلامه. بس موضوع قاعده في مكانج وانا بنت زينه وحدي اكلمك بالنت وتعال لي البيت بعدين ؟ ممكن تصير بس بصراحه صعبه جدا، لانه ارد واقولكم، الي دش الموقع ما دش عشان يتزوج تقليدي، ويبي يستفيد من التكنولوجيا الحديثة في التعارف، وانتو يا بعد تواكبون هالشيء يا لا تدشون وتدوخون روحكم، وتحطون روحكم في مواقف لا تحسدون عليها.
هذا زواج يا بنات الناس، هذا انسان راح تعيشين معاه باجي عمرج! هذا انسان راح يكون زوج وأخ ووالد، هل تبين تقضين باجي عمرج مع انسان ما تعرفينه ؟ ولا قعدتي معاه قعده وحده بالبيت وشكله عجبج وبس؟ ما فكرتو ليش نسبة الطلاق وصلت لي 50 بالمئه عندنا ؟! يعني كل اثنين يتزوجون، واحد فيهم قاعد يطلق! ما بالكم في الي تقول نتعرف انترنت وبعدها تعال تقدم حقي، في النهايه ماكو مقارنه بين كلمات بالانترنت، عن لمن تكونين مع شخص، وتشوفين نظراته وشكله وحركاته، سبحان الله ممكن يخفقله قلبج وترتاحين جدا وممكن بالعكس يصير نفور وعدم ارتياح بالمره.
في النهاية انا ما افرض افكاري على احد، ولكن اتكلم من باب خبرتي وقناعتي وعلمي، في ناس راح تقتنع في الكلام وفي ناس راح ترفضه، ولكن في النهاية ما تقدرون تنكرون انه في مشكلة صح؟ واذا هالمشكلة مستمره معناته في شيء خطأ سواء من صوبنا ولا صوبكم لازم يتعدل او يتغير، مو سامعين المثل الي يقول من الجنون انه الشخص يقوم بنفس التصرف مرارا وتكرارا ويتوقع نتيجة مختلفه.
اتمنى تكونون استفدتو من كلامي، واني ما اكون طولت عليكم، وربي يشهد علي اني ما اقصد بكلامي هذا اني اخرب البنات او الشباب، ولكن طالما هناك نية صادقه وزينه، فان شاء الله ربنا يسهل على الجميع.
تحياتي لكم جميعا،
اخوكم بشار
edited by Basharca on 10/16/2011
|
|
3/3/2012 3:52:31 AM
|
|
الصدمة والواقع في موقع خطبة!
|
السلام عليكم،
بدون مقدمات بدش في الموضوع وبتكلم بكل صراحة وبشفافية.
الي صاير في الموقع أن الكثيرين من البنات يشتكون من أن الشباب مو جادين وقاعدين يلعبون، وبالمقابل الكثير من الشباب يشتكون من طلبات البنات الغير واقعية. هذا الكلام أقوله لأنه قريته كثير من الطرفين.
المهم انا بركز في كلامي على البنات الي داشين وجادين في موضوع الزواج، لأنه البنات الي داشين للوناسة وتغيير جو ما أعتقد أبي أضيع وقتي وأتكلم عنهم. المشكلة الله يسلمكم في البنات الي جادين أن نسبة كبيرة منهم غير واقعيين! وهذا بسبب الجهل وعدم الخبرة او بساطة التفكير وسمحولي اشرحلكم شلون.
الحين لمن البنت تدش الموقع وتسجل فيه وتعتقد أن اهيه راح تتزوج من خلال إنها تتعرف على شاب من خلال الموقع عن طريق الجات فقط، هذا اول شيء تفكير غير واقعي! إذا كنتي داشة الموقع وشايفة روحج متحفظة وما تقدرين تتعرفين على الشخص غير في اطار الجات عيل الأفضل تنتظرين في بيتكم لمن ييي حقج النصيب. وقبل لا البعض يستاء من كلامي، أمانه جم وحده فيكم دشت وانصدمت وبعدها قالت الشباب مو جادين ويلعبون ؟؟ لا غلطانين في نسبة ليست بقليلة جادة ولكن إسلوبكم الخاطئ اهوه الي يمنع مثل هذا الارتباط.
نعطي بعض الأمثله عشان نكون أوضح، من مزايا موقع خطبة أن الواحد يحط صورته صح؟ البعض بحكم العادات والتقاليد ما يحب يحط صورته ولكن في حالة تم التعارف من حق الريال يشوف صورتج، الي تقول والله اسمحلي ما اقدر احط صورتي، هذه وين عايشة؟ الريال يبي يتزوج كمبيوتر ولا يتزوج بنت لازم يكون شايفها ومرتاح لها. هذا سبب قوي يخلي وايد رياييل يبتعدون عن البنات لأنه مثل ما تعطين نفسج الحق تشوفين الريال، الريال يبي يشوفج. فأرجوك كوني واقعية ولا تعيشين في عالم الخيال وبعدها الصدمة تكون قوية وتشتكين ماكو جادين، لا حبيبتي اكو جادين بس انتي شغلي مخج شوي.
كذلك أبي اتكلم عن البنات الي داشين الموقع وحاطين شروط الدنيا، ترى كل بنت يحق لها تحط شروط ولكن البعض مسوي فيها جنه الله خلقها وما خلق غيرها! داشة الموقع تستعرض وكأنها تقول انا أحسن من الجميع، طبعا بحكم دراستي بالامور الإجتماعية والنفسية تبين أن هالنوعية من البنات في الغالب يكونون يعانون من نقص في الثقة بالنفس ولهذا السبب تبي الكمال من الغير واهيه عارفه روحها مو كاملة وبعيدة عن الكمال.
لا ترفعين خشمج فوق لأنه صدقيني مردة راح ينكسر، ومردج إذا ظليتي وايد تتفلسفين راح يمر الوقت وبعدها تقبلين بواحد مواصفاته وايد أقل من الي كنتي تبينها.
في النهاية قناعتي أن البنت الذكية والشاطرة والله تييب راس أكبر ريال لأنه عندها إسلوب وتعرف متى تاخذ وتعرف متى تعطي. أما البنت الي تعطي كل شيء بغباء ما راح تكسب الريال والبنت المعقدة الي كل شيء لأ بقاموسها وممنوع وما تتنازل عن شيء كذلك راح تعيش حالة صعبة وفي الأغلب راح تظل وحيدة.
حياتك هي اختيارك، انت تقدر تكسب الي حواليك وانت تقدر تنفر منك، خليكم واقعيين في طلباتكم، خليكم متعاونين مع الرجال اذا كانت طلباتهم واقعية وما تجرح او فيها خدش للحياء وراح تشوفون أن راح تتزوجون وتعيشون السعادة الي تنشدونها. أما إسلوب كل شيء ممنوع فصدقيني قعدي في بيتكم أحسن وتركي عنج الموقع لأنه صعب تلقين ريال يرضى في هالشيء خاصه في زمن التفتح والتطور وكذلك البنت الي تعطي الريال كل شيء، ما راح تجذب الريال حقها وبالتالي ممكن يستغلها.
أغلب البنات الي داشين الموقع داشينه لأنه يبون يتزوجون، وقطار العمر يمضي بسرعة، فحاولي قدر الإمكان تكبرين فرصج في الإرتباط والزواج بدال ما تبعدينها.
أتمنى تكون وصلت الفكرة، وأتمنى في ناس تستفيد منها وتطبقها.
وشكرا،
|
|
3/3/2012 12:26:11 PM
|
|
الصدمة والواقع في موقع خطبة!
|
شكرا اخي على التفاعل والرد الطيب وان شاء الله نعمل بنصيحتك
بس اختلف معاك في أن الي حاصل يحصل في كل المواقع، لا أنا اعتقد إحنا كشعب خليجي وكويتي تحديدا مو عارفين بالضبط الإسلوب الأفضل الي نتعامل فيه وعندنا خوف وسوء ظن بالآخرين اكبر من اللازم، وهذا الي يخلي البعض يخاف حتى من ظله.
شفت مواقع عربية اخرى للزواج، تشمل مصريين وتونسيين وغيره ولاحظت أن نسبة الرضا وايد اكبر من مواقعنا اهني.
خوف البنات الزايد وشروطهم يبعد عنهم الشاب الزين ويقرب منهم الشاب السيء المتلون والي بعدها ينصدمون فيه!
تحياتي لك،
|
|
1
|