|
10/21/2008 5:32:32 PM
|
|
قصص من الواقع
|
القصه هذي ابطالها حقيقيون و من اعضاء احدي المواقع الألكترونيه للزواج و صاحبتها موجوده في احدي الدول الخليجيه . قصه حب مأساويه و صاحبه الرساله تحتاج فزعه . تقول فيها :
*** اظهر لي اهتمامه في بروفايلي و راسلني تحت عنوان " مهتم جدا " و ابدي رغبته بالتواصل . شفت بروفايله عجبني من حيث المعلومات ، لأنها كانت متطابقه للمواصفات اللي ابيها تماما . رديت
علي رسالته و اظهرت له قبولي بالتواصل فأبدي رغبه شديده بالتواصل معي عبر الهاتف و لأنه شافني حريصه علي نفسي اصر انه جاد في موضوع الزواج و مايبي يلعب و قال اقسم بالله العظيم اذا ماصار شي راح امسح رقمج.
تحدثنا و عرفنا عن بعض معلومات اوليه قال انه متزوج و يبي زوجه ثانيه علي سنه الله و رسوله و انا
ماكان عندي مانع . صار في اعجاب مبدئي شديد من الطرفين ادي الي الرغبه باللقاء . طلب يشوف صورتي بالمسنجر و انا وريته لأن من حقنا المشروع نشوف بعض و خصوصا ان كل واحد منا جاد في الموضوع و صار قبول من الطرفين مبدئيا تكلمنا مع بعض بجديه اكثر و شوي تعمقنا في الخصوصيات .
و ماقلنا ولا كلمه تخدش الحياء العام و كلامنا كله كان عن الحياة بشكل عام و امنياتنا و طموحنا . اكتشفت انه فارس احلامي اللي طول عمري كنت ادور عليه . كنت مستانسه ان الله ياب لي اللي
في بالي بويهي من غير ما التفت يمين شمال . كنت فرحانه ان اللي احلم فيه فتح قلبي و دخل فيه من غير استئذان و من غير تخطيط حتي . كل اللي كنت احلم فيه كان موجود في الشخص هذا . كل شي كل شي فيه كان جميل . حبيته من كل قلبي حبيته بعقلي . حبيته من اخلاقه من حديثه من شهامته من كرمه من طيبته من حنانه من حبه لوالدينه . حبيبي اروع انسان عرفته في حياتي . حبيته بصدق و كنت احلم انه ربي يكتب لنا النصيب في الزواج .
قال لي انا معجب فيج و انتي مافي احسن منج و مو ناقصج اي شي . كل الصفات اللي يبيها الريال
موجوده فيج . بس عندي مشكله وحده ابي زواج سري . لأن اهلي بصراحه مايقبلون بالتعدد . انا ظروفي شوي صعبه و استثنائيه و انا انسان بحاجه شديده الي الزوجه الثانيه لأني اعاني من زواجي حاليا و انا من زمان قاعد ادور علي زواج ثاني . انا محتاج اتزوج لكن ماقدر اتزوج علني و ثقي تماما لو قررت اني اتزوج راح تكونين انتي زوجتي لأنج " فل اوبشين " و مو ناقصج اي شي و مافي داعي ادور علي وحده ثانيه .
في البدايه انا حاولت اقنعه و اساعده انه يواجه اهله و يقول لهم بكل صراحه ان الزواج الثاني من حق كل رجل مسلم . لكن يوم شفته انه ضعيف و مايقدر يواجه لا زوجته و لا اهله قبلت اني اتزوجه زواج سري و اتنازل عن كثير من الحقوق الزوجيه عشان لا اخسره كزوج . استغرب و انصدم من حبي الكبير
و النقي اللي احمله في قلبي و اتجاهه فطلب مني مهله و قال ارد لج الخبر لأني لازم ارتب اموري . وافقت و بعد مده كلمني و قال " انا صرفت النظر في موضوع الزواج نهائي و انا احب زوجتي و اعتقد
اني اقدر استمر معاها و ماني بحاجه الي الزواج " . الخبر كان مثل السيف ذبحني قتلني . ترجيته قلت له ماراح اخلي احد يعرف انك تزوجت و اوفر لك اسباب الراحه النفسيه و اسوي كل اللي تبيه مني بس ارجوك لاتتركني . انا ابيك زوج علي سنه الله و رسوله . لكنه ماوافق ...
تدرون يا جماعه شنو صار ؟ قبل فتره سجل مره ثانيه في الموقع ، لا و نفس المره الأولي دش بروفايلي
برغبته و ارادته و هو عارف نكي . مسجل في الموقع و حاط المعلومات نفسها و الكلام نفسه . علي باله ماراح اعرفه علي باله حبه سهل و اقدر انساه . انا اعرفه من انفاسه لو غير اسمه 50 الف مره بس هم اعرفه . و الطريف انه طلع فعلا حبيبي لأني جكيته بطريقتي الخاصه .
|
|
10/21/2008 5:34:40 PM
|
|
قصص من الواقع
|
تكمله القصه :
واجهته هرب مني . كلمته مارد علي . طرشت له مسجات رد علي و هددني انه راح يفضحني جدام اهلي . شوفو شلون يجازيني ؟ يبي يفضحني ! و هو ناسي اني انا بعد اقدر افضحه جدام زوجته و
اهله بس مو انا اللي افضح حبيبي . اهانني سبني قل ادبه معاي قال لي بشتكي عليج في المخفرقلت له ميخالف هذي نتيجه حبي لك . الحين قاعده اترجاه انه يكلمني مره بس مو راضي .
انا الشخص هذا احبه يا ناس . هذا حبيبي اللي تمنيته طول عمري . هو احسن واحد في الدنيا و لو انه اسو ء شخص و اسو ء مخلوق بس هم احبه و ابيه . انا مستعده افديه حياتي و كل شي بس اتزوجه علي سنه الله و رسوله . مستعده اسوي اللي يبيه و اموت فيه بس اصير زوجته . مستعده اني اشوفه بالأسبوع مره بس يكون حلالي . مابي منه اي شي بس يتزوجني بس ادخل حياته بس
يكون لي . انا ماقدر اتخيل نفسي زوجه لشخص ثاني غيره . حبيبي مقتنع فيني اني انسانه ماكو احسن مني ، و مجرب الشي هذا و معترف لي انه ماينقصني اي شي . يدري اني احبه وايد . يدري اني اموت فيه . مستحيل اخليه يتزوج غيري و مستحيل اتزوج غيره . انا احبه و اذا ماتزوجني و تزوج غيري بنتحر . اذا ماقال لي ليش مايبيني زوجه راح انتحر . ابي اعرف ليش رافضني ؟
ياناس قولو له احبه و ماقدر علي فراقه . حبيبي كل يوم يدش المنتدي و يقرا المشاركات قولو له حبيبتك تحبك . والله ماسويت له اي شي غير اني حبيته . يا ناس قولو حق حبيبي ماقدر استغني عنه .
يا ناس هو مهددني انه يفضح حبي و انا حالفه قبل لا يشوه حبي انتحر . قولو له يكلمني بس مره تكفوووووووون ****
منقول
اخوكم / فارس كويتي
|
|
10/22/2008 1:56:27 AM
|
|
قصص من الواقع
|
انا الشخص هذا احبه يا ناس . هذا حبيبي اللي تمنيته طول عمري . هو احسن واحد في الدنيا و لو انه اسو ء شخص و اسو ء مخلوق بس هم احبه و ابيه . انا مستعده افديه حياتي و كل شي بس اتزوجه علي سنه الله و رسوله . مستعده اسوي اللي يبيه و اموت فيه بس اصير زوجته . مستعده اني اشوفه بالأسبوع مره بس يكون حلالي . مابي منه اي شي بس يتزوجني بس ادخل حياته بس
يكون لي . انا ماقدر اتخيل نفسي زوجه لشخص ثاني غيره . حبيبي مقتنع فيني اني انسانه ماكو احسن مني ، و مجرب الشي هذا و معترف لي انه ماينقصني اي شي . يدري اني احبه وايد . يدري اني اموت فيه .
عمري ماسمعت كلام مثل هذا
يحرق القلب والله و يالقساة قلب هذا الحبيب
اخوكم / فارس كويتي
|
|
11/25/2008 2:27:01 AM
|
|
الزواج السري اوالمسيار.......لماذا؟
|
السلام عليكم و رحمه الله و بركاته
هذه رساله من احدي الأخوات الفاضلات ، انقلها لكم كما جاءت للإفادة و الإستفادة .
تقول فيها :
****** سلام عليكم
انا ابي اتكلم عن قصتي ، انا وحده حالي حال كل بنات العالم سجلت في الموقع بقصد الزواج
و كنت ولازلت جاده في الموضوع . سبحان الله عمري ماتوقعت ان الرياييل جذي يطلعون . يمكن
مو كلهم جذي لكن انا هذا هو حظي. و يمكن اصلا الله سبحانه مقدر اني اتزوج واحد من الفئه
هذه !! مادري والله !
راح اكتب لكم قصتي مع كل واحد منهم .
الأول : اهتم فيني و راسلني . و من كثر ماكان جاد و معجب في بروفايلي عطاني رقمه و قال انا
مابي رسايل ما رسايل ، انا انسان جاد جدا و ابي اتزوج و مابي خرابيط دقي علي عشان نتفاهم .
كلمته و تبين عندي انه ولد عائله كريمه وظيفته محترمه و منصب عالي و مثقف و محترم و خلوق
يصلي يخاف ربه و مايدور خرابيط . متزوج و عنده عيال . مستعد انه يفتح لي بيت و مصروف شهري
و خدامه و مهر و كل شي بس بشرط يكون زواج مسيار او سري ، مايبي عيال و لازم استغني عن
مسألة المبيت !!! عنده شويه مشاكل مع زوجته و قاعد يضحي حق عائلته بس محد يقدره و تعبان
يبي احد يدللله و يهتم فيه . الزوجه مقصره في حقه عاطفيا و شايف انه يستحق انه يتزوج و بحاجه
ملحه الي الزوجه الثانيه . بس مايقدر يقول لزوجته انه يتزوج عليها لأنها راح تترك البيت و تصير مشاكل
و هم اهله مايرضون انه يتزوج لأنه في عائلته ماكو واحد متزوج ثنتين . و يخاف من زوجته و ابو زوجته
و نظرة المجتمع و كلام الناس ان فلان متزوج مرتين !!
الثاني : اهتم فيني و راسلني . قال لي انه مهتم حيل و معجب في بروفايلي و انه جاد . الريال
متزوج و عنده عيال ، من عائله معروفه حيل حيل ، وظيفه مرموقه و منصب كبير و دراسات عليا .
غني و محترم و خلوق و يخاف ربه و يصلي و جاد في موضوع الزواج و يحمل رقم ذهبي !
طبعا شي طبيعي اني اكلمه طالما اننا جادين في موضوع الزواج ولا حرج في ذلك لأننا مو يهال
بعد ولا يايين نلعب . لأن اللي يبي يلعب مايدور نت ، الله يخلي المجمعات !! طبعا كلمته مره وحده
و مبدئيا كان في قبول و قررنا الإستمراريه . قال لي انا مستعد اتزوجج و ادفع لج مهر و شبكه و كل
شي و احط لج سكن و مصروف شهري و سياره و خدامه و كل شي و لكن بشرط الزواج يكون سري !
مابي اهلي يدرون لأن اول شي اهلي مايرضون اني اتزوج علي زوجتي لأن زوجتي مايعيبها شي و
انا ابن بار لوالديني و مابي اغضبهم . واللي يخليني ادور علي زوجه ثانيه اني ريال عندي طاقه زياده
شويه و زوجه وحده ماتكفيني و ابي الستر و ادور حلال . بس ابي زواج سري .
|
|
11/25/2008 2:31:47 AM
|
|
الزواج السري اوالمسيار.......لماذا؟
|
تكمله الرساله :
الثالث : اهتم فيني و راسلني و كان قمه في الجديه ، ماكلمته بالتلفون ولكن تبادلنا الحديث عن
طريق المسنجر و لأنه كان حيل صادق و جاد في الموضوع ، قال لي كل شي عنه ... سبحان الله
طلع شخصيه سياسيه اكاديميه جدا معروفه ، وظيفه و اخلاق و احترام و كل شي كل شي . يعني
من اروع ما يمكن و ماكان يعيبه ولا شي . المهم قال انا ماعندي مشكله مع زوجتي ولكن عندي
طاقه زياده و الحمدلله عندي الخير موجود . و انا انسان اخاف ربي مابي ارتكب ذنوب و الحلال موجود
ابي اتزوج بالحلال و حقج راح يكون محفوظ من الألف الي الياء . بس ابيج توافقين زواجنا يكون سري .
و انا يومين في الاسبوع اكون متواجد معاج في البيت الزوجيه و ماراح اقصر معاج . و لأنه سفراتي
كثيره زوجتي ماراح تشك اصلا اني موجود في الكويت !!!
الرابع : استاذ جامعي حالته حاله و مدرس في احدي الكليات في الجامعه ، زوجته متسلطه و حيل
دفشه ، يبي الستر يدور علي الراحه النفسيه و يبي يتزوج بالحلال و نفس الشي يحافظ علي
حقوق الزوجه كلها . اذا زوجته درت انه تزوج راح تتطلب الطلاق لأنها مهددته قبل المره هذه انك لو
تزوجت لازم تطلقني قبل زواجك . و اذا تطلقوا ، الناس شراح يقولون و بالتالي راح تصير فضيحه !!
|
|
11/25/2008 2:35:46 AM
|
|
الزواج السري اوالمسيار.......لماذا؟
|
تكمله الرساله :
طبعا اخي الكريم هذه 4 حالات من الحالات اللي صادفتهم في الموقع و في حياتي . و ياما في
رياييل موجودين في الكويت و حالتهم اصعب من الحاله هذي . و انا اتوقع ان مشكله الزواج بالطرق
الغير معروفه اصبحت ظاهره في الكويت . والظاهره هذه تحتاج الي تدخل من علماء الإجتماع و النفس
والشريعه ايضا . لأنها ظاهره خطيره تضر المجتمع و تحتاج الي حل جذري و توعيه و ارشاد . حللوا
الحالات هذه بعمق . حللوها من كل النواحي . الإجتمايه و النفسيه و الشرعيه . شوفوا الريال اللي
يلجأ لهذه المفكوره ، والله انه يكسر الخاطر . رجل تعيس تعيس بكل معني الكلمه . وكـأنه يبي يبوق .
شكثر يضطر انه يكذب علي اهله و زوجته لما يسألونه وين كنت او وين تروح . الواحد يشفق عليه الصراحه . مايقدر يطلع مع زوجته خوفا من عيون المجتمع . لا سوق لا سفر لا اي شي . حتي المستشفي مايقدر يوديها . مو الديره صغيره و الكل يعرف الثاني . و تخيلوا لو كانو يبون يسافرون العمره حتي. تعال حل المشكله لو احد شافهم في المطار !!! ولا تعالو شوفو الزوجه المسكينه ! لو تبي ساعه تطلع مع زوجها
و تتمشي معاه ، ماتقدر و كأنها بترتكب جريمه !!! ماتقدر حتي تمارس ابسط حقوقها الزوجيه و هو الخروج مع زوجها جدام العالم !! و كأنها متزوجته عشان يزورها وقت ما هو تعبان او محتاج حب و ( .... ) و يبي
يحس انه انسان له احساس و شعور و يفرغ فيها طاقته و يمشي ! الحين لو الزوجه ام العيال مثلا درت
بالسالفه ، شراح يكون موقف الريال ؟ شي طبيعي انه راح يطلق الزوجه الثانيه لأنه كان متزوجها اساسا لأسباب تتعلق بالنفسيه فقط ، و بالتالي مابيي يفضح نفسه في المجتمع لأنه لو ماكان يهمه كلام الناس
جان من اول شي ماوهق نفسه بزواج سري او المسيار !! بالتالي حقوق الزوجه الثانيه راح تضيع !
والله مصيبه هذا واحنا مسلمين و عايشين
في مجتمع مسلم و الناس اللي نتعامل معاهم مسلمين و عارفين ابسط الأمور في الإسلام ، لكن
نستحي لو طبقنا الشريعه الإسلاميه في بلاد الإسلام !!!! لا و نلوم الكفار ليش يهينون الإسلام و المسلمين و الرسول عليه الصلاة و السلام !!!!!! ******
طبعا بالنسبه لي ماعندي اي تعليق غير اني اقول علي الإسلام السلام !
اخوكم / فارس كويتي
|
|
11/26/2008 7:05:30 PM
|
|
الزواج السري اوالمسيار.......لماذا؟
|
الأخ الكريم بوجاسم الهدف من نشر هذه الرساله هو :
اولا : حكم المجتمع الإسلامي من التعدد و لماذا يلجأ الرجل الي زواج المسيار او السري ، اذا كان الشرع قد حلل التعدد
ثانيا : أخذ آراء علماء النفس و الإجتماع
ثالثا و الأهم : طالما الحلال موجود و مباح ، مالضروره لخوف الرجل من الزوجه الأولي و المجتمع بالتالي الإشهار ؟ و فعلا الرياييل اللي يتزوجون سري ماراح يقدرون يطلعون بره و هذا مو مبالغ فيه . تخيل نفسك ونت متزوج سري و طالع مع زوجتك الثانيه و احد شافك ! يا اما بيقول عن اللي معاك ( الغيرل فريند ) يا اما زوجتك ! ففي الحالتين انت قاعد تسئ لسمعتك !
اخوكم / فارس كويتي
|
|
1
|