Khitba.com

صفحات 1 2 3
	10/8/2008 12:00:02 PM
Q80Y Posts 2	مع احترامي للجميع انا راح ابدي وجهة نظري ولو ان محد سألني عنها بس قولوا لقافه,,, المهم اني بقول شي على الاقل عشان احس بوجودي , ماعلينا ندخل بالموضوع .. انا شايف ان موضوع الزواج عن طريق النت محفوف بالمخاطر .. حلوه محفوف وحطوا تحتها خطين لأن انا شايف ان مو معقولة اني اتزوج من وحده فقط عرفتها عن طريق النت وطبعا هالحجي ايضا موجه للبنات , مثال : يمكن اكون انا مدمن او خريج سجون او راعي مشاكل وكذاب , وبنفس الوقت اجيد فن الاقناع والحجي المصفف وطبعا محد يعرف عني شي او انا منو بالاساس ؟ ... والله يكون بعونها اللي راح تكون من نصيبي << طبعا انا اقول مثلا مثلا ... بنت الحلال ماصدقت لقت لها واحد تفصال هندي مضبوط مية بالمية وخريج جامعه مع مرتبة اشرف من الشرف .. واهو بالحقيقه يمكن يكون تعليم موازي مع احترامي للجميع بس اهي تطمح بدكتور او مهندس اومحامي او طيار .. الخ المهم ان يكون من ذوي الوظائف العالية والدخل الممتاز عشان تقدر توفر لنفسها ولبيتها اللي ناوية تبنيه مع زوج المستقبل افضل وارقى حياة .. وبالاخير تتفاجأ انه .. استغفر الله (*****) ومايسوى بيزه ويمكن يكون حقير بعد ومايخاف الله فيها , هالحجي طبعا ينطبق على الاثنين ــــــــ خلاصة الحجي انا اشوف اننا في مجتمع محافظ وتربيتنا وبيئتنا اللي احنا عايشين فيها تحتم علينا الزواج التقليدي اللي عن طريق الاقارب او المعارف مو شرط اقارب المهم اننا نعرف شي عن هالاسره ,, يمكن يكون رايي جريء جدا من هالناحيه والاجرأ ان يمكن اللي يسوق لهالشغله اهو المستفيد << المعنى في بطن الشاعر والله يكون بعون الشاعر مثال انا لما اسوي شي وانطر منه مردود مادي اكيد راح اسوي له دعاية وراح أألف القصص عشان ينجح هالشي واعتقد انكم والحمدلله فهمتوا.. وسلامتكم اعتقد ان المعنى وصل وتمنياتي بالتوفيق للجميع
	10/8/2008 1:20:00 PM
Manart Posts 69	بسم الله الرحمن الرحيم اللهم صلي على محمد وآل محمد اعتذر جدا إن كان تدخلي غير مقبول في هذا الموضوع ولكن ابتدأ التعليق السريع بهذه الاية المباركة يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ وهي رد على ما جاء في السطور الاخيره بدون التطرق المباشر لهذا الامر بالنسبة للزواج التقليدي ارى ان الشاب في الخطبه من الطبيعي جدا ان يضبط اخلاقه وتعامله بلباقه ثم الموقع هو بدايه تعارف بين الاثنين ثم يأتي بعدها تعارف الاهل والسؤال عن الشاب والفتاة ايضا ان كان فيه أي خلل يظهر من خلال السؤال عن اخلاقه بالطبع لن يتم الاعتماد على ما يأتي من تعارف هنا امامهم لقاءات كثيره وسوف تسقط الاقنعه وتتجلى الحقائق التي تكمن خلف الاستار ونحن هنا ندعوا الجميع للمزيد من المصداقيه والصراحه ان كان جاداً في امره وشكرا
	10/8/2008 1:34:42 PM
gem Posts 267	يا كويتي يا بعد جبدي ... حتى لو اقتنعت ست الحسن بسي السيد ما زالت هناك بالتقاليد رد للخاطب يقوله عطونا فرصة نسأل و الكويت ( يا عيني ... لو تنسى نفسك و انت ماشي بالسيارة راح يردونك بالصليب الدولي لانك تخطيت الحدود الدولية ...) مهما كان الرجل او الست دجالين و عباقرة بالاقناع ... فابواو ام التعليم الموازي او كل الكذب الاخر هيتكشف و يبان و عليكم انشاالله الامان بس القصة مو بهذه حبيبي كويتي ... القصة هي انه مهما ظن الشخص انه اخذ فترة بالتعارف و خبز الطرف الاخر ... بتكون الكثير من جوانب الشخصية الدقيقة اللي يحرص كل واحد انه ما يطلعها الا بعد الزواج او انها اصلا ما تبين الا بعد الارتباط و اللي لها تاثير مدمر ... خافية على الطرف الاخر .. و هذه هي الاشيا اللي مالها غفارية ... تعال عاد ...( و الله محد طقك او طقج على ايدكم ... مو كنت جدامك او جدامج ؟؟؟ يعني كنت موافق او موفقه على كل شي فيني .. شللي تغير ... و تعال عاد فجج ) اذا طلعوا خوش اوادم راح يحاولون يحلون هالمشاكل او الاختلافات بالتوافق و التقارب .. اما ان طلعوا من عيال فري كويت ... لا المحامين عزت الله ربحوا اثنين متعادين و تعال عاد رفع قضايا لما يفلسونهم و و يبيعونهم حتى ملابسهم . و الله يكافيكم الشر
	10/8/2008 1:44:10 PM
misharko Posts 2	اول شي الله يعطيك العافيه على هالراي الحلو انا اييد كلامك بس انه ماينطبق على كل الحالات وكلن راح يلقى نصيبه بالنت والا زواج تقليدي والا ابأي مكان وزمان وعلى العموم الله يستر من هالبشر الحين اللي للاسف الاغلبيه بس اخذ منهم ديكور يعني الظاهر شي والباطن شي ثاني مابي اطول عليك لو بكتب ماخلص مع تحياتي وشكرا
	10/8/2008 7:49:01 PM
call.97231486 Posts 1	بسم الله الرحمن الرحيم السلام عليكم ورحمة الله وبركاته اول شي احب اشكر الادارة على اضافة المنتدى للتعرف اكثر عالاعضاء لكن عندي وجهة نظر بالنسبة للزواج عن طريق الانترنت انا اشوف انه مسألة تعتمد على اكثر من اساس اول شي الاساس الديني ممكن من خلال متابعة ردود نتعرف على الخلفية الدينية للانسان اللي نتكلم معاه ثاني شي اذا ارتحنا لعضو من الاعضاء وحبينا نرتبط فيه ناخذ عنوانه ونسأل عنه وعن اهله ويصير نفس الاسلوب التقليدي يعني الزواج التقليدي نسأل عن العوايل اللي عندهم بنات نشوف العائلة ونسأل عن سمعتها ومدى الخطر فيه مثل الخطورة في الزواج التقليدي ما نقدر نكتشفه إلا بعد المعاشرة
	10/9/2008 12:34:55 AM
soswaa86 Posts 2	السلام عليكم : اول شيء السالفه كلها وجهة نظر من صوب و حظ من صوب و نصيب من صوب . يعني ممكن الواحد يتزوج زواج تقليدي و يكونون عارفين العايله عدل و منو اهم بس يمكن البنت او الولد مو زينين او ما يتأقلمون ويا بعض !!!! و ممكن همن من النت تكون علاقه كلها جذب ؟ و ممكن تكون بالعكس علاقة صريحه و يرتاحون حق بعض فراح اعرفون بعض عدل و تتطور العلاقة بينهم . فمانقدر نحكم ونقول هالطريقه صح ولا لا ؟؟؟؟ و شكرا
	10/9/2008 2:00:12 AM
eros82 Posts 11	يعطيكم العافيه جميعاً على هل موضوع الحلو والي كاتبه احلى منه طبعا وجهة نظر صحيحه وانا اايدك بصراحه انه النت عباره عن شبكة تجمع الصالح والطالح فا الواحد مايقدر يثق ثقة عمياء او انه يعتمد على النت بانه سبيل من سبل او طرق تيسير الزواج او الحصول على نصفك الثاني بس ترى هم ممكن ههههههههه ادري بتقول كلامي يناقض نفسه بس صج ترى الواحد مايدري يمكن صدفه او شي بس كلامي انه مايعتمد عليه لان بالنهايه حتى لو شاف بنيه يازتله او يابنيه شفتي شاب يازلج وعجبج بالنهايه هم راح يصير تعارف جدي والاهل يسؤلون عن الاهل ولويه يعني سالفة طويله مو سهله النت اعتبره جنك شفت البنيه بالجمعيه ولحقتها لي بيتها تالي عرفت منو بنته ورحت قلت لهلك اخطبوها شالفرق . بل النت احسن اصلا على الاقل سولفت وياها وعرفت منطوقها وحجيها واسلوبها بتقولي ماخفي كان اعظم وفي شغلات ماتبين الا بالعشره انا معاك صحيح بس هم ترى لما اهلك يخطبولك زواج تقليدي او شنو ماكان نوع الزواج الي اتخذته حابها حابتك شايفها لاحقها او بالماسنجر الي يصير هم مهما دامت العلاقه بينكم اكيد العشره غير وبتطلع شغلات غير لان طول فتره الخطبه والملجه والتعارف لين مايتسكر عليكم باب الغرفه وانتو كل واحد يظهر احسن ما عنده لكي يعجب الطرف الاخر ويزداد تمسكه فيه فا من وجهة نظري كل واحد بياخذ نصيبه بغض النظر عن الوسيله الواحد يتوكل على الله والطيبون للطيبات . فا اجزم اخو قلبي وتوكل على الله ووقت الصجيه كل شي يطلع لاتحاتين تشكرات افندم
	10/9/2008 3:56:12 AM
Karbala Posts 318	السلام عليكم اخوي كويتي .. اشكرك على هذا الموضوع اللي الصراحة مهم جدا ... واشكر كل من علق بالردود اخواني الكرام .. أولا: انا اعتقد انه الهدف الأساسي من الموقع هو فقط لتقريب الناس بين بعض لهدف الزواج .. حاله حال اي موقع آخر متخصص بأي شئ ثاني ولكن هذا الموقع صار تخصص الزواج ... وموضوع الزواج عن طريق الانترنت هذا المفهوم غلط عند وايد ناس .. هو بالاصح اسمه التعارف عن طريق الانترنت بهدف الزواج وثانيا: منو الشخص سواء بنت او ولد ... يبي يسولف بالشات والمراسلة من وراء شاشه كمبيوتر .. وبعد كم يوم يروح يصير زواج الموضوع في وايد مقدمات ... واهم شئ بالموضوع انه لازم الموضوع يكون في صدق وأمانة والا .. الزواج يفشل سواء عن طريق النت أو غيره وانا الصراحة حصلت وايد مقالب في هذا الموقع ... البيانات اللي حاطتها البنت .. غلط في غلط .. ولدرجة حتى الجنسية غير مكتوب كويتية وهي مو كويتية بس لما صار تعارف واتفاق .. يوم وقت الصجية .. اشوف البنت تبدأ بالاعترافات .. وكم مره صارت فيني عموما طولت عليكم ... ما اقول الا انه الزواج قسمة ونصيب تقبلوا تحياتي
	10/9/2008 10:33:21 AM
ahmedabdo200200 Posts 1	السلام عليكم بس حبيت اسال عن الادارة هلى نيتها بهذا الموقع فعل الخير أم الكسب منه؟ ارجو الرد وان كان الرد بفعل الخير فلم لا تجعل وسيلة للتواصل بدون اشتراك ففى الناس الكثيييييييير الذى لا يقدر على الاشتراك وان كان غير ذلك فوضح لنا هذا الكسب حلال ام حرام ام ماذا مشكووووووووووووووووور كتير لسعة صدركم والله الموفق
	10/9/2008 2:33:20 PM
SHAMERE Posts 5	شكرا لك ... ‏ ‏عن ‏ ‏أبي هريرة ‏ ‏قال .. ‏‏قال رسول الله ‏ ‏صلى الله عليه وسلم ‏ ‏من كان يؤمن بالله واليوم الآخر فليكرم ضيفه ومن كان يؤمن بالله واليوم الآخر فلا يؤذ جاره ومن كان يؤمن بالله واليوم الآخر فليقل خيرا أو ليصمت .. حديث واضح وصريح .. أخرجه البخاري ومسلم .. الهدف من موضوعك ان ادارة الموقع همها الأول من هذا الموقع هو جمع المال .. انا معاك ان الموقع كأنك بسجن ياليت انهم شوي يعطون العضو حرية التواصل مع الآخرين اذا كانت نيتهم فعلا لله وهي جمع شمل العزاب .. ولكن ان تأتي بهذه النية التي ستحاسب عليها ماتدري ما الهدف الحقيقي من هذا الموقع .. هل تعلم ان حصلت زواج عن طريق هذا الموقع بعد التوكل على الله وان هنالك فعلا ناس نيتها الزواج ؟؟ أبشرك كثير تزوجوا من هذا الموقع ثانيا في ناس مقطوعة من شجرة مالهم لا قريب ولا بعيد والله وفقهم عن طريق هذا الموقع وتزوجوا وعندهم عيال ( مو انا لا تحاتي ) وليش لأ يمكن أكون منهم ان شاءالله .. ثانيا ... اللي بتتزوج .. وفعلا انها تكون اتفقت مع واحد على الزواج .. الله لا يهينها تروح لأقرب محكمة وتطلع سيرة الرجل من الألف إلى الياء .. الزواج قسمة ونصيب . وما المانع ان كان عن طريق النت ؟؟ قال الله تعالى ( واذا حييتم بتحية فحيوا باحسن منها او ردوها ان الله كان على كل شي حسيبا ) سورة النساء
	10/9/2008 9:35:22 PM
lolitaa Posts 28	السلام عليكم خوش موضوع مع وجود اختلاف في وجهات النظر براي سواء زواج تقليدي او عن طريق النت او الخطابه نفس الشي في كل الحالات لازم نسال عن الطرفين واهلهم وهو امر طبيعي اما بالنسبه للسلبيات موجوده والشخصيه تنكشف ولو بشكل بسيط من خلال التعارف سواء بالكلام او بالمقابله لكن في كثير من الاشياء الواحد مايكتشفها الا بالعشره والا جان ماصار طلاق والسبب اكتشاف الطرف الاخر بعد فتره من العشره والنصيب مكتوب الواحد مايدري وين ؟؟؟؟؟؟؟؟؟ كله بيد رب العالمين وفي علم الغيب والواحد يسعى..... كلمه اخيره ( انما الامم الاخلاق فان ذهبت اخلاقهم ذهبوا ) اهم شي النيه الصافيه والصدق مع الطرف الاخر وشكرااااااااااااا
	10/10/2008 4:55:47 AM
m7taaar Posts 2	السيلام عليكم جميعا ابي اقول رأيي في الموضوع ... انا اللي اعرفه بشكل عاااام ان البنات يقعدون في بيوتهم لين يجيهم نصيبهم ولكن .. من تقطعت بهم السبل وضاقت عليهم الدنيا واحتارو في امرهم والخوف من قطار الزواج ان يفوتهم ..تجدهم يبحثون عن الزوج المناسب بأي طريقه ( مثل النت) ولكن شخصيا انا لا استطيع التخيل ان اتزوج عن طريق النت .. لنفرض مثلا كان هناك نصيب لشخص ما وتزوج عن طريق النت واستقر في حياته وانجب اولاد وبعد عشرة عمر وسنين طويله ..يأتي احد الاولاد ويسأل والده ويقول.. يبه اشلون تعرفت علي امي ؟... يكون الجواب (( والله ياوليدي عرفتها وتزوجتها عن طريق النت !!)).. للامانه الموضوع معقد والاراء فيه تتعدد .. قرأت في مشاركه لبعض الاخوان يسأل عن الهدف من انشاء الموقع .. ومن غير زعل انا اشوف ان السؤال ساذج جدا ..ولو كان الهدف سامي ولوجه الله خالصا ..تطلب الاداره رسم رمزي نظير الاشتراك ونقول مثلا ..دينار فقط والاكيد ان الهدف هو الربح المادي فقط ..(( الاداره لسان حالها يقول ..ان تزوجو خير وبركه واذا ماتزوجو بكيفهم ..وفي الحالتين الاداره تقبض )) ملاحظه مني شخصيا (( معظم البنات 95 % تقريبا ..سجلو في الموقع للتسليه فقط ..ومعظم الشباب 95% تقريبا سجلو في الموقع لأهداف غير الزواج:cool) اخوكم محتار سجل في الموقع للاطلاع فقط .. للجادين وللجادات في هذا الموقع وخارج الموقع والطامعين في الاستقرار وتأسيس بيت الزوجيه اقول لهم .. يعلم الله وحده اني اتمني لكم كل الخير والتوفيق لزواج ناجح مستقر بأذن الله دمتم بخير جميعا
	10/10/2008 9:41:00 PM
MRS.Q8 Posts 24	السىلام عليكم أنا كتبت رأي في اعلان الزواج واختفى من كل المنتدى زين أبي أفهم العضو المشترك في الموقع اللي يطلب مدة معينه للزواج ليش؟؟ ليش معقوله بنات حوا الشرقيات المحافظات اللي فعلا اهمه يبون السترة من ظروفهن أكيد ما لجأت لهالموقع وأؤكد الا عشان تخلي الموضوع بسترة على قدر ما اهو الموضوع حساس ما تبي تمشي وتقول أبي أتزوج تر وايد صعبه والمثل قال اخطب لبنتك والرسول صلي الله عليه وسلم أوصانا بالتحقق من الكفاءة زين ليش ما يكون أعضاء الموقع صدقج صادقين ليش صغار بالعمر يلهفون على الحريم اللي أكبر منهم للتسلية وغيره وما أدري ليش المتزوج يبي زواج بالخشيش أبي أفهم والله الهدف من انشاء الموقع وايد راقي وصدقج مو لازم يساء استخدامه للتعارف اللي مايروح ولا يودي وكلام مأخوذ خيره يبى يا شباب أرجوكم ليش ما نكون صريحين تر والله العظيم التوفيق من رب العالمين لما يكون كل شي واضح من البدايه للنهاية وعسى نسمع عن زواجات تمت بالفعل ونشارك فرحتهم للمعاريس اللي ضبطت واياهم التعرف وبهذه المناسبة تجان زين الموقع يرصد لنا الحالات الناجحة ! ودمنم بخير
	10/12/2008 5:02:16 AM
kuwaiti1979 Posts 1	السلام عليكم جميعأ اشكر اخوي كويتي على الموضوع الجميل واشكر كل من تابع هالموضوع وشارك فيه بالحقيقه احب اقول شغله معروفه وماراح اطولها (النصيب يصيب) سؤاءأ بالنت او برى وشكرأ وتقبلوا فائق تحياتي
	10/12/2008 10:05:00 PM
miss_3afeesa Posts 110	السلام عليكم صراحه موضوع وايد مهم المشكله انكم كلكم كلام صح بس الحين انا بعرف اذا الشاب استانس وارتاح لوحده بالنت وراح قابلها واتفقوا على كل شي ماراح يراجع نفسه ويقول يمكن بعد شافت وكلمت غيري مثل ماكلمتني؟ وهم البنت فهل راح تكون هناك ثقه بين الطرفين بعد الزواج واذا البنيه اهلها مايدرون ------- مثلي مثلا------ شنو راح يقولهم تعرفت عليها بالنت الله خووووش موقف واذا ما قال كل شوي يهددني بهالكلمه لا لا الحين صج انا خفت
	10/12/2008 11:54:09 PM
gem Posts 267	هو احلى ما في الموضو انج تخافين بالمقام الاول ... بالنت او بغيرها هي المقابلة الاولى و بعدين خطبة ؟؟ طبعا محد راح يثق بالاخر البنت مفترض انها ما تحقق له المقابلة الا بعد ما تكون تاكدت من شخصيته بشكل مبدئي ما يقبل النقاش و لا القسمة و اللي يحدد هذا الامر هو امر هام جدا العقل و لا شي غيره ... اذا ترك اي انسان اختيارة بتفحص الطرف الاخر ...( الللللله المشية .. البسمة ... المادري شنو و الا شنو و الا ... الخ ) و كل هذا ترك قياسه للقلب فقط ... خله يبشر بالتكرفس و على الوجه اختيار الطرف الاخر لا يتم قبول النداء فيه الا بعد ختم العقل له ... و هنا لازم العقل يحط الموضوع و يشتغل عليه بشكل رياضي اللي من بعدها محد يسال على قولة المصريين ... تلت التلاتة كام اكيد لازم تخافين يا اختي العزيزة و لكن اذا كنتي من اهل العقل صج ... فلا تتوجسين اكثر مما يحتاج الامر و بعدين اكو اهل يسالون و يمحصون و هم بعد يحمصون المعلومات عنه ... الاساس انج تشيلين العفيسة من تفكيرج و تركزين عدل ... و في تمارين ممتازة لهذا الامر على فكرة اذا الاخ بيقابلج و بعدين بيغير رايه تكون ساعة السعد لج لانه ما يستاهلج بوقته ... ليش قابلج ...للزواج ؟؟ اصبح ليش يغير راية .... للعب ؟؟ ... ابركها ساعه العذر منكم على الاطالة
	10/13/2008 12:08:35 AM
lolitaa Posts 28	مرحباااااااااا ياعفيسه صج انج عفييسه شدعوه تفكيرج جذي رجعي ترى الزمن تطور والدنيا تغيرت الحين الواحد يقول حق اهله انا احب وحده وابيها شالمشكله وعلى قولتج اذا الواحد بيشوف وحده من النت وبيفكر انها شافت غيره شالمشكله الحين البنت مايخطبونها واييون يشوفونها بالبيت نفس الشي دام مكان عام والشرع حلل رؤية الشاب للفتاه قبل الزواج هذي مافيها شي غيري تفكيرج لايصير سطحي والكلام للكل احنا مو قاعدين نسوي شي غلط مو قاعدين نتفرفر بالشارع ونتعرف على فلان وعلان ومو من اول مره بنكلم واحد عالنت ركضنا نشوفه لابد من التعارف والقبول بالاول والله يوفق الجميع ويستر عالكل
	10/13/2008 10:44:49 AM
gem Posts 267	على فكرة يا مس ... فكرة الزواج بالنت ما عادت قائمة على بحث الشباب ... للعلم بانها صارت اكثر و اكثر للكبار و اللي يتزوجون عن طريق التعارف من النت يزيدون ... فلا تحتاين ... اهلج ان عصبوا اول ما يدرون بعد اسبوع بالكثير راح يتعاملون مع هالوضع بالشكل المعقول ... لا تخافين ما راح ياخذون اللاب و لا الموبايل ... لان المجتمع كله ابتدى يتفهم هالتكنولوجيا ... هم يخافون مثلا من الركضة وراها بالشكل اللي يؤثر سلبا على اولادهم و بناتهم و لكن اذا سار الامر بعقلانية و الكل حفظ نفسه و سار بالامر على ما يرام فما راح بالنهاية يعارضون ... خاصة الاهل يحليلهم من تقول لهم زواج ... حتى ممكن ما يسالون من وين و اشلون ... الخ .
	10/13/2008 5:16:40 PM
Karbala Posts 318	ahmedabdo200200 كتب: السلام عليكم بس حبيت اسال عن الادارة هلى نيتها بهذا الموقع فعل الخير أم الكسب منه؟ ارجو الرد وان كان الرد بفعل الخير فلم لا تجعل وسيلة للتواصل بدون اشتراك ففى الناس الكثيييييييير الذى لا يقدر على الاشتراك وان كان غير ذلك فوضح لنا هذا الكسب حلال ام حرام ام ماذا مشكووووووووووووووووور كتير لسعة صدركم والله الموفق السلام عليكم اخي الكريم .. لماذا تبخل بدفع مبلغ صغير مقابل ضمان مستقبل لك والحصول على البنت الحلال هل تعرف كم تكاليف عمل موقع والمصاريف الشهرية للسيرفر والشغلات الفنية ... الخ تراه مو مبلغ بسيط .. ثانيا لو بتطلب من خطابة تحصل لك بنت الحلال .. كم بتاخذ منك ؟؟؟؟ اعتقد ان المبلغ اللي تدفعه للموقع يستحق .. مقابل الشئ اللي تبي تاخذه من الموقع اسمحلي على المداخلة .. هذا مجرد وجه نظر لا اكثر ولا أقل تقبل تحياتي أخوكم/ كربلا
	10/14/2008 8:09:05 PM
miss_3afeesa Posts 110	السلام عليكم شكران على الرد بس انا تفكيري مو رجعي صدمتيني لوليتا شلن تقولين عني جذي انا من كثر مو قاعده اقرا بالنت كل اللي اشوف كلامهم يقولون ماراح ناخذ من النت بس نبي نلعب وهالخرابيط اكيد اصابع ايدي مو سوا بس هم لازم تفكيرين اكثر من مره لان اللي جدامج ماراح تبين شخصيته للي عقب الزواج بعدين انا مو خايفه من رده الفعل من الاهل بالعكس على قوله gem مايصدقون يفتكون مني لوووووووول انا قصدي الصبي نفسه لان رفيجتي تطلقت بعد قصه حب من النت لانه صار يشك فيها عقب الزواج وبس ماابي اصير مطلقه عانس ولا مطلقه وشكراااااااااااااااان وتفكيري مو سطحي ولا رجعي انا انسانه مثقفه
صفحات 1 2 3

|