صفحات 1
8/9/2012 6:29:48 AM
mishalnet
Posts 11
بسم الله الرحمن الرحيم

السلام عليكم ورحمة الله وبركاته

بدايةً موضوعي يطرح مجموعة قضايا اجتماعية عايشتها ولكن بسردها على شكل مسيرة حياتي

من واقع تجربتي بالحياة اقول ان اصعب شي انه يقدر لك تولد بعد عدد من البنات بمعنى يكون ترتيبك في الاسرة الاخير وانت الولد الوحيد ( بتقولون مدلل و سعيد حظ وماعندهم غيرة ) وانا اقول مو شرط

البنات صاروا حمل على ظهري مع انهم اكبر مني بس من انولدت وانا في خدمتهم هم المدللين وانا اللي علي التعب شلت حملهم مع الوالد الله يعطيه العافية وطولة العمر
طلبات البيت وصيانة البيت مقابل العمال والحديقة يبيلها سقاية وتنظيم وطلبات البقاله وتوصيل الاهل مع السايق من مدرسة وكليات وجامعات وتصليح وصيانة السيارات وكل امور الحياة
اما السوق فحدث ولا حرج كنت اوديهم مع السايق ومقابلهم من محل ل محل والله اكره شي عندي السوق يكسر الظهر
واذكر في يوم كنت توني ما وصلت سن البلوغ كنت اتحلطم على الوالده اني ابي مصروفي حالي حال البنات يعني اشمعنى هم ياخذون اكثر وانا ما اخذ حتى ربع اللي ياخذونه
عصبت علي وقالت البنات لهم طلبات خاصة مو مثلكم انتم يالصبيان البنات يبون ( ملابس وذهب وستيان وشلحة وقعدت تعدد شغلات اول مره اسمعها ..... ) بصراحة استحيت وبالكويتي انطميت مايسوى علي الرد لكن استوعبت ان البنات غير غير غير عني مع اننا في بيت واحد الا اني ما اعرف عن امورهم الخاصة شي الحمدالله تربينا تربية نظيفة من صغر

ولكن المهم والخلاصة ان البنت غييييير ومن هنا بدت رحلتي
عدلت سلوكياتي مع خواتي صرت ما اعصب عليهم واحاول اني البي طلباتهم وما عليه نصبر لحد ما الله يكتب لهم حياة جديدة ويتوفقون بزواج
ومرت الايام كنت بالسفر انا اللي ماكلها وهم والله مالهم غير الدلع انا اللي اساعد الوالد ( كله يزفني جدام الناس وعصبي الى ابعد الحدود وحصلت كف منه دايسني دوس بعصبيته يعصب على لا شي ) واشوف طلبات المطاعم وادور الفنادق واتعب على راحتهم وهم طول السفر اوووف ملينا وزهقنا ونبي ونبي
اكيد مو حاسين بالتعب اللي اتعبه لانهم ماجربوا
كنت صغير بالعمر ولما نوصل البلد اللي قاصدينه والحمدالله نلقى سكن كنت ما ارضى وحده فيهم تمد ايدها تشيل اغراضها او جنطتها لان الاغراض ثقيله كنت اشيلهم بروحي لحد ما صار فيني خلع بالسره ( ههههههه ) من الاحمال الثقيله وبعدها حاشني تسمم من فطيرة لحم ( اكيد لحم جلب ) واسهال وترجيع ومع هذا صامد ما تنازلت عن مبادئ

وعدّت الايام وتزوجوا خواتي والحمدالله ماقصرنا معاهم لا بسوق ولا صالون ولا حتى زفه اللي في خاطرهم سويناه
فتحوا بيوت والله رزقهم الذرية والحمدالله

يتبع
8/9/2012 2:34:37 PM
mishalnet
Posts 11
تابع 2

خلال هالفترة كنت ولد طموووح ومتطور وجسمي كان بالعامية ( عرد) اتهاوش مع اكثر من 12 شخص بروحي الله عطاني العافية واحطهم فوق بعض ( قصة حب بنت جيرنا وقت الهوشة لما شافتني طقيتهم وكانت الهوشة جدام بيتهم كانت الهوشة بالعصي والسلاسل وطابوق وراسي طلع منه دم بس كملت الهوشة للاخر الطرف الثاني واحد منهم اغمى عليه بعد ما ركزت بالضرب على وجهه وراسة طاح بالارض اغمى عليه والباقين فيهم اصابات متفرقه وانحاشوا وبنت الجيران علمت امها وامها دقت على امي وقتها كانت الهوشة الظهر بس انا مارديت البيت ودمي يغلي من سالفة الغدرة لانهم اغدروا علي وانا ما كنت حاسب لهم حساب وصار اللي صار رحت بعز الظهر طلبت الفزعه من عيال خالي وربعهم واجريت اتصالاتي لحد ما تجمعنا بالليل وكان عددنا اكثر من 30 شخص لقيت اللي غدروا علي قاعدين على الشارع العام المقابل للمنطقة اللي يمنا قاعدين بالدجه يضحكون طلعت انا لهم من الداعوس وحذفت عليهم صخر وقاموا كلهم يلحقوني وهربت لحد ماطلعت من الداعوس كان ربعي مندسين ورا الداعوس والفريق الثاني من ربعي التفوا خلف الداعوس من الجهه الثانية واطبقنا عليهم الحصار وطقينهم طق وكل الشارع طلع من اصوات الصراخ وحذف البطول والشارع امتلى زجاج مكسور وذبحناهم ذبح وقتها ارتحت نفسيا بعد ما نفذت انتقامي لان كانوا ينظرون لي بنظرة المسكين اللي ما عنده اخوان ولما رديت البيت امي قعدت تزفني انت ما تعلم انك متهاوش وانت شلعت قلبي تهاوش وماتعلم وليش وما ليش وهالكلام والله صج والله يشهد اني مازدت حرف هذي كانت تفاصيل وحدة من مشاجراتي الكبيرة )
انا عشت كل مراهقتي بتفاصيلها باستثناء الزنى والمغازل والخمر والمحرمات
بديت اعيش الثقافة والادب والكمبيوتر في نهاية التسعينات لكن مرت حياتي بمرحلة اثرت على قراراتي
الا وهو ( الـــــــــــعـــــــــــــــــــــــبــــــــــــــــــــــــــــــــــث )
الوالد الله يحفظه كان انسان جامعي بس عصبي ومزاجي تدخل بتعليمي بشكل مو طبيعي فرض علي ادخل مجال انا ما احبه ولا يصلح لي وحاولت وصار يزعل علي ومايكلمني عذبني بصراحه ورضخت لان دخلت في فتنة عقوق الوالددين بعنادي له
ومرت اكثر من 7 سنين من حياتي ضيااااااااااااااااااااااااااااااااع فكري ونفسي و وجداني اعيش بعالم مو عالمي
وبعد ال 7سنوات قلت ستووووب انت يبه عالعين والراسه وانا صار عمري 21 سنه لا تدخل بحياتي الحين ببني حياتي من جديد وزعل وعصب
وقلت يبه بكيفك شنو يفيدني رضاك وعنادك
اسمح لي انا بحذف ال7 سنين ورى ظهري وببني نفسي من جديد
مرحلة الحرب و ولاء اهل البيت لرب البيت
وقفوا كلهم ضدي لا من ام ولا خوات ولا ابو يسندني في قراري الجديد
والحمدالله جاني الدعم المالي من المعهد بخ علينا فلوس اكثر من غيرنا وتبهدلت فترة التدريب من مكان ل مكان وشفت بلاوي الدنيا لكني بالنهاية الاول عالدفعه
ولما عطوني شهادة التقدير والدرع قالي الوالد من غير نفس مبروك
توظفت ومجال عملي كرهوني لاني كويتي بين وافدين ومجتهد بالعمل صاروا يحاربوني ويكتبون فيني تقارير تزوير في تزوير لاني مؤهل اصير مسؤل عليهم واخذ اماكنهم والله ظلموني بشكل كبيييير
شكيت حالي عند الوالد على امل يشوف لي واسطة ينقلني لان رفضوا نقلي صار الوالد يتشمت علي وانا قلت لك من الاول وانت ماتطيع وياما قلنا لك بس انت تعاند
وياليتني ماتكلمت خوووش ابووو انت
ورحت ونقلت بذراعي محد توسط لي هددت المسؤلين اني جاد وبرفع شكوى للمحكمة الادارية وبحاسبهم واحد واحد وحقي لو على قص رقبتي ما اتنازل عنه
ونفذت وعدتي وعند اول خطوة من الشكوى خافوا المسؤلين وقعوا على اوراق نقلي
ونقلت والحمدالله مرتاح في دوامي الحالي وراتبي زاد اكثر من 180 وصار مجموع الراتب اكثر من 1000 دينار
اهنيه احترق كرت الوالد وطلع لي كرت جديد اللي اهو كرت الوالده
(الزوااااااااج)
طبعا بعد الوظيفة بديت اميل لجو الرومانسية والاناقة والاسلوب المنمق واطور مهاراتي في الحوار صرت اتعمق بثقافة الرومانسيات لقيت انه عالم ممتع وايضا صرت انسان اميل للتعاليم الدينية وانجذبت لامور ديننا وروعته والدين عطاني قوة اني انتصر للحب لما تابعة سيرة الرسول صلى الله عليه وسلم مع زوجاته جتني قوة مو طبيعية اني ما اهتم لسالفة خروف مرته او سكانه مرته كان ودي اجرب اعيش الحب وانتصر لحبي ودي تكون عندي زوجه ادفيها بحناني وكنت صادق في رغباتي ولكن ... بقولكم شصار
ثلاث اسنين وانا ارفض بنت عارضينها علي اهلي واهي بنت تقرب لامي من الدرجة الاولى ومو كويتية وانا مصر ابي كويتية متعلمه ومثقفة
واهلي ماعندهم غير هالبنت لحد ما لاعت جبدي و وافقت

يتبع
8/9/2012 2:37:04 PM
mishalnet
Posts 11
وانا ليلة عرسي انصدمت بالبنت ماتفهم شي بالحياة لوعة جبدي لكن عاملتها باحترام وحاولت انها تتطور بس ماكو فايدة وصرفت عليها تشتري وتخزن بالكبت ماتلبس ولا هي قايمه بواجبي وفوق هذا فيها امراض وكل شوي اوديها المستشفى وغير انها عندها مشاكل بالحمل وماتبي تتعالج وعندي فحوصات تثبت انها عندها مشاكل
واهلي تضايقوا منها وطلبوا مني اطلقها وكثرت المشاكل ودافعت عنها واهي مو كفوا راحت قالت للناس اني ما اجيب عيال
وطلقتها وارتحت منها ومن بلاويها
وامي ندمت على اختيارها وضغطها علي وشافت بعينها اني مظلوم طوووول حياتي منهم
الكل انحرجوا مني محد يبي كلمني لانهم ماطاعوني لما قلت لهم انا بحالتي ادرى وانا هالشي مايناسبني الكل اعترفوا لي انهم ماكانوا يتصورون اني تفكيري كبير و واعي
انا حبيت اسرد هذي المسيرة عشان اقول يا شباب انا مو قليل شر ولا اشكي من قلة رجوله الحمدالله عشت حياتي بكفاح بكل تفاصيلها وقفت على رجل وحدة واهلي حطوني في مواقف صعبة ومع هذا ما احتقرت المرأه بيوم ولا اتخذت قرار اني ما اغازل من خجل
بالعكس اتفه شي عندي الكلام الحلو والاسلوب المنمّق وفلوسي الحمدالله تارسة البنك ومن كسب ذراعي اتاجر واشتغل بوظيفه صعبة لكنها ماتصعب على الشاطر
وسيارتي غالية ولبسي ماركات وغالي حتى الساعة اللي لابسها سعرها فوق ال 200 دينار وعايش بخير من فضل ربي
لكني ما اعبث باعراض الناس استغفر الله شلون تطيب لكم نفسكم تزنون وتغازلون واللي ماشاءالله عنده زوجه سنعه ويكلم بنات من وراها
وهالشي انصدمت منه لان حتى ربعي الخاصيين طاحوا بالزنى واللي كانوا قمة في الاحترام لكن طلعوا نظام سوالف من تحت لتحت
حتى اني ماعرف احد من الشباب ماجرب المغازل ولا زنى
مع اني عشت ظروف قاهره وبوضعي الحالي عندي فلوس وخير ومع هذا ما سافرت ادور المراقص والديسكوات مع ان الحاجة تدفعني لكن مو هذا العشم فيني
من يوم ربي خلق فيني شيمه وقيمة وعزة نفس
اليوم اعيش حياتي اكتب في الاوراق احاول ما اشغل نفسي بموضوع الزواج اهدف للنجومية من خلال كتباتي بعد ما الفت مجموعة كتب عرضتها على دكاترة في الجامعة ابدوا تعجبهم بالمؤلفات حتى انهم اتهموني اني اخذا كتاباتي من مصادر احترافية لاني ما صرت جامعي لحد الحين ( مادري هالجامعي شفيه من زود بكره بصير جامعي واكثر من جامعي ان شاءالله بس الموهبه ماتجيبها الشهاده الاكاديمية لاني انسان موهوب وعلمتني الحياة اكثر من الدكتور )
الحمدالله انا شخصية قوية محبوبه وطموحة واحترم الناس واقدرهم وكذلك الناس يحترموني يرغبون في قربي لكني اعرضت عنهم لانشغالي بتعويض خساير الماضي
الكبير اللي فوق سن 40 يحبني واللي بالثلاثينات يحبوني واللي بالعشرينات يحبوني والمراهقين والاطفال لاني شخصية تعلمت شلون اكسب ود الناس وحبهم
ومع هذا في بداية شهر رمضان اصبت برجلي اصابة ملاعب اثرت على حركتي تحتاج لشهر من الراحة والعلاج وهنيه لقيت نفسي معزول عن العالم البيت فاضي ومحد يراعيني غير الوالده الله يحفظها هي تعاني من امراض ولا ودي اشغلها معاي ترسل لي فطوري لان بالحركة مو ذاك الزود اتعب بسبب الاصابة والسحور اللي يرحم الحال اي شي بارد يبقى من الفطور ( قناعة .... الحمدالله )
وبديت اتشافى الحمدالله بس لحد الحين الحركة تزعجني
عرفت اني لازم اتزوج لا الكاتبه ولا الورق غيرت الواقع والحين انا بفراشي زهقت من الوحده
ااااااه
تمنيت والمخلوق في دنيته طماع
يقضي حياته ما انتهى من مطاليبه
تمنيت خدود(ن) فيها الذهب لمّاع
وشعر(ن) يوريك الذهب في قواليبه
لكن منو يزوجني خواتي مشغولين في حياتهم وتربية عيالهم الله يعينهم والوالده كبيرة سن الله يحفظها وانا في منتصف العشرينات احمل لقب مطلق مع اني ما ذقت من الزواج الا اسمه
وماعندي علاقات مع بنات عشان اقول ابي فلانه بنت فلان
اوووووف مليت
جنه البلد مافيه بنات بس الحين بدت تدور براسي اروح المغرب واتزوج ....... ختام
8/14/2012 8:37:33 PM
gmorah
Posts 3
الله يعطيك العافيه اخوي
الله يكون بعونك وييسر امرك ويفتحها بويهك وتأكد لانك انسان صادق مع نفسك قبل ماتكون صادق مع غيرك تحترم ذاتك وتفرض على الكل احترامك الله راح يوفقك ويعوضك بالي تستاهل خلك مقتنع من هالشغله اذا البشر يضيعون الله بعد عيني مايضيعنا

تقبل احترامي لشخصك الكريم
8/28/2012 12:25:33 AM
coconutt
Posts 1
الله يرزقك ويعوضك
9/9/2012 4:02:17 AM
sara12
Posts 44
اخوي تقول انك ما تدور مغازل و ما تركض ورا شهواتك وكاتب في الختام بروح المغرب اتزوج اشمعنه المغرب يعنى كل الديره عارفين شنو يميز المغرب وليش بعض الرجال يروحون لها انا قريت الى كاتبه حرف حرف فيك مشكلة بسيطه انت مو ملتفت لها تدري شنو انك ما تتحمل مسؤولية اختيارك قطيت اللوم كله على اهلك كلنا نتعرض لضغوط من الاهل هلووو احنا في مجتمعات شرعية هذا نظام التربية السائد فيها انت اخترت تتزوج الى اهم يبونها ما اعتقد حطو مسدس على راسك واجبروك نصيحه من اخت اذا انت فعلا رجل واعي وتحس انك تعاني من اضطهاد اعتقد في مراكز مختصه لهالامور فيها ناس اهل اختصاص يساعدونك ويشرحون لك صح كلامي اتمنى لك التوفيق
10/16/2012 3:39:06 AM
kindeng.1965
Posts 98
اخواني الكرام
انا اتعجب من تناقض بعض المشتركات
والتي تتصنع الثقافه وهي ثقافه مزيفه ، ويكتبون اراء سقيمه ، ولا تفتأ تتدخل في اراء
باقي المشتركين الجيده وهي في الخفاء ترسل رسائل مليئه بالاحقاد والضغينه
والتي معروفه اسبابها ورواسبها التاريخيه ، والمشكله بدون سبب كما يقولون بالكلام العامي
مني والطريج ..
اظن ان العنوسه وعدم الزواج شي جيد لبعض المشتركات لانهن غير مهيئات له ابدا
الزواج لا ينجح الا بمعايير ، ولكن اكثر المشتركات لا يملكن الا الطلبات او نفث عقدهم من الرجال بسبب تاخر الزواج او لاسباب عرقيه او طائفيه
10/25/2012 2:33:45 PM
Dodo89
Posts 98
حلوووو كلامك اخووي والرواايه اللي رويتهاا
مبين من كتابتك لهاا عندك ثقاافه وحب للكتابه


وابشر بعزك انت كنت جاااد للزواراج ادور لك
دش علي عالخاص وقول لي المواصفات اللي تبي
ومن اي قبيله عسى ربي يكتب اللي فيه الخير
لك وللجمييع
11/17/2012 12:03:58 PM
7asnae
Posts 15
سلام عليكم اخوي والله انصدمت لما قلت انك بتروح المغرب وتتزوج مغربيه اقولك انت غلطان انت أخلاقك عاليه ههههههههه والله حاله
صفحات 1
|
تسجيل faq AspNetForum v.0.0.0.0