khalid327 - جميع رسائل المستخدم
4/19/2009 7:39:54 PM
رحلة الى كاتلونيا راح اتكلم عن رحلتي شهر واحد اللي فات الى برشلونة الساحرة

الخطوط الناقلة : القطرية الى مدريد

الرحلة الى برشلونة: عندكم خيارين اما الطيران الداخلي ويستغرق ساعة او القطار السريع ويستغرق ثلاث ساعات

بالنسبة لرحلتنا كانت بالقطار السريع مع ان حاجزين طيران داخلي بس صاحبي كان حالف مايركب الطيران الداخلي من الخوف فكانت رحلتنا الصراحة بالقطار ممتعة وانت تمر على
المناظر اللي تفتح النفس - مو نفس الدرب اللي اقطعه كل يوم لي الدوام - وصلنا المحطة ومنها لأقرب تاكسي رحنا على الفندق اللي حاجزينه من الكويت ومكانه استراتيجي وهو (رويال رامبلا) الفندق الصراحة حلو وسعره ممتاز الغرفة الدبل (40) دينار , طبعا مثل ما انا وصاحبي مخططين كنا ماخذين اسامي الاماكن السياحية ومخزنين اماكن ثانية ب (الجارمن) بس ما اشتغل هناك بس مو مشكلة لأن الباص السياحي موجود خذينا تذكرة حق يومين طلعت يمكن 15 يورو للشخص ويعطونكم خريطة للأماكن وخط سير الباص وهناك نوعين انصحكم فيهم خط السير الاحمر والازرق لانهم يمرون على غالبية معالم برشلونة واهمها:

القرية الاولومبية
الكامب نو
حديقة جاودي Gaudi's Garden
The Gothic Quart
التلفريك : اللي تقريبا يقطع برشلونة
وشغلات وايد مذكورة بالخريطة
اعجبك المكان انزل واخذ جم صورة وانطر عند المحطة كل 15 دقيقة باص ثاني راح يمر على المحطة
المشكلة ان الوقت اللي رحنا فيه مو شي لأن عندهم مدينة ملاهي كبيرة كانت مسكرة وتفتح بالصيف + الكرنفالات اللي تكون الرامبلا جدام الفندق اللي قلت لكم عليه وعلى امتداد الشارع
احنا اللي صادفناهم بالشارع الرسامين اللي ممكن يرسمونكم بعشر دقايق مقابل سعر رمزي + محلات souvenir + اخر الشارع في ثتمثال لكولومبوس وبعدين المارينا مالتهم
مع مجمع التسوق حق اللي يحبون التسوق انا انصح اللي يروح هناك انه مايخذ شغلات وايد من الكويت لأن هناك عندهم كل شي ارخص من الكويت بالنسبة للملابس وغيرها
وعندهم سينما ايماكس واكواريوم وكلهم صوب المجمع الشغل كله مشي من الفندق يعني لاتكاسي ولا شي واللي يبي يبسوي رجيم يروح هناك , وعندهم سلسلة مجمعات اسمها لاكورت انجليس وهو عبارة عن مجمع وفيه غالبية الماركات , الصراحة انا كيفت على اديداس ونايك وغيرها من الماركات الرياضية اللي ماينزلون عندنا بالكويت الا الستوكات , وبالنسبة للاكل
المطاعم بأنواعها موجودة في نفس الشارع .

اما للشباب فراح اقول لهم عن الكامب نو الخيال الكامب نو الروعة احنا على وقتنا كانت في مباراة لبرشلونة مع نومانثيا ومالنا خلق نروح حق الملعب او ندور على اماكن بيع التذاكر
بس انت في معقل الكتالان مافي مشكلة اللوبي مال فندقنا تكفل بالعملية هذي ب 100 يورو التذكرة مع المواصلات روحة وردة والسواق وصلنا لين الكراسي فكانت ذكرى لاتنسى صراحة

هذا بالنسبة لبرشلونة الساحرة

خلاصة الموضوع ان برشلونة انا اعتقد حلوة اكثر بالصيف , لان الوقت اللي رحت لها فيه كانت شوي هادية وتصلح حق شهر عسل مو نفس حالتي مجابل رفيجي الايام هذي كلها

اتمنى ان الموضوع عجبكم
edited by khalid327 on 4/20/2009
الصفحات 1
تسجيل faq AspNetForum v.0.0.0.0