butalf
Posts 14
|
ياذيب قلبك جسور وهيبتك في دهاك ،،
وعيون الأعراب والله مالقت غير أثرك ،،
من عادتك تطوي البيدا وتكسب عشاك ،،
واللي يبي صيدتك عود وهو ماقدرك ،،
خلك على الرجم واللي يرصدك من اعداك ،،
يخاف من جرة أقدامك ويخشى خطرك ،،
لا تنحني للتراب تعد ممشى خطاك ،،
حاول على قد ماتقدر تبعد نظرك ،،
ولا تحسبن العيون مغمضة ماتراك ،،
الناس هالحين مايخفى عليهم خبرك ،،
ولو نال منك التعب والوقت بيح خفاك ،،
هذا نصيبك من الدنيا وهذا قدرك ،،
تسمع صياح العرب ياذيب والعلم جاك ،،
ولو راعك الغدر بكره مايفيدك حذرك ،،
خوفك من البرد للضلع المهايف حداك ،،
والضلع لويقدر يكسر ضلوعك كسرك ،،
ترميك الأقدار بين اللي غدرك وجفاك ،،
ليتك تركت المكان اللي جفاك وغدرك ،،
تشبعك يمناك والوادي تحت ماعطاك ،،
غير الجفا والطعون اللي تجي في ظهرك ،،
احزم ضلوعك عن اهل الارض وابعد مداك ،،
عن شوف ناس يصبون الغضب في نحرك ،،
والناس لو تنتهك ضلعك وتدخل حماك ،،
لاتشره الا على عزمك وحدة بصرك ،،
مرباك قتال ودروبك ظلام وهلاك ،،
وعواك مسموع وفعولك مع اللي حقرك ،،
مالك من الضلع غير الجوع يطوي اشواك ،،
والبرد يشذب عراقيبك ويشوي سحرك ،،
حظك على الوادي اللي مايذري رماك ،،
ولومك على اللي على ضلع المعادي جبرك ،،
قنيب جوفك صدى حزنك وزفرة حشاك ،،
ولومنت مهيوب محد بالشجاعة ذكرك ،،
يشهد لك اللي على أحفاده كتبك وقراك ،،
ولا أنت عالم من الصعب الزمن يختصرك ،،
ياوجد حالي عليك من الزمن لا وطاك ،،
وخليت رجمك ومرقابك وعبرة قهرك ،،،
|